Javier Fernández empieza güei un viaxe económicu y comercial a la capital del país, onde se va axuntar col ministru de la Vivienda y d’Urbanismu

El xefe del Executivu va participar el xueves nel actu d'inauguración de la sé de la Confederación Asturiana de la Construcción n'Arxel

El presidente del Principáu d'Asturies, Javier Fernández, va visitar los díes 3 y 4 de xunetu la capital d'Arxelia acompañáu pol conseyeru d'Economía y Empléu, Graciano Torre; el director del Idepa, Carlos Morilla; y un grupu d'empresarios con intereses comerciales nesti país del Magreb.

Con esta visita oficial –entamada a instancia de les empreses asturianes del sector de la construcción pa encontar les relaciones comerciales que tienen nel país africanu—, el Gobiernu asturianu quier promocionar el texíu empresarial asturianu y a les empreses, dotaes de conocencies, esperiencia y tamañu afayadizu pa collaborar en desenvolvimientos industriales, tecnolóxicos y d'infraestructures n'Arxelia.

Na axenda de contactos institucionales, el xefe del Executivu tien previsto entrevistase col ministru de la Vivienda y d’Urbanismu, Abdelmadjid Tebboune. L'axenda de Javier Fernández complétase cola inauguración de la sé que la Confederación Asturiana de la Construcción, xunto con Asprocón y la Fundación Laboral de la Construcción, instaló n'Arxel. 

La miedra y la recuperación económica, según el volume d'oportunidaes de negociu que presenta'l plan de renovación y ampliación d'infraestructures pa la modernización económica d'Arxelia, espertaron un enorme interés nel empresariáu asturianu. Constitúin sectores prioritarios la enerxía, la construcción, cableaxe, bienes d'equipu, maquinaria industrial, mediu ambiente, tresporte, electrónica ya informática, material llétrico ya infraestructures ya inxeniería civil.