Por segundu añu consecutivu Ernesto González y Paula Moya, de la compañía “Con Alevosía Teatro”, van llevar a cabu una llectura de poemes na Casona del Bravial de Blimea. L’actividá va celebrase’l próximu vienres 28 de xunu, y nella van lleese un refileru de poesíes  de temática variada, principalmente rellacionaes col mundu de la muyer y mui apegaes a la realidá y la crítica social, tanto en castellanu como n’asturianu. L’actu ta entamáu pola Asociación de Muyeres Fontana de Blimea en collaboración col Institutu Asturianu de la Muyer y l'Ayuntamientu de Samartín del Rei Aurelio.

“Con Alevosía Teatro” ye una compañía de Llaviana que nos sos 7 años de trayeutoria tien desendolcaos trabayos pa tou tipu de públicu, tanto infantil como adulto. Nes sos actuaciones busquen conxugar la so interpretación con otres disciplines artístiques como la música, la danza, les artes plástiques o nesti casu, la poesía. Ente los sos espectáculos destaquen, per un llau, pal públicu infantil “Payasadas”, “Sorpresa” o “El viaje inesperado”, y pal públicu adulto “Si pudiera...”,  “3017”,  “Romeo y Julieta” o “El último en morir que apague la luz”, ente otros.

L’actu ta abiertu a toes aquelles persones  interesaes y va contar cola presencia de la conceyala d’Educación, Cultura y Deporte del conceyu de Samartín del Rei Aurelio, Gema Suárez Torre, que va abrir l’actu xunto a Aida Corte Iglesias, presidenta de l’Asociación de Muyeres “Fontana”.