García Poo: “Les declaraciones del presidente del Parlamentu asturianu son otra preba más del desentendimientu de los socialistes pa cola presencia del asturianu na escuela”

La diputada de FORO María del Mar García Poo llamenta les declaraciones del presidente de la Xunta Xeneral del Principáu, Pedro Sanjurjo, nes que refuga cualquier acción concreta p’asegurar el futuru de l’asignatura de Llingua asturiana cola nueva Llei d’Educación, tres el conceyu que tuvo cola Asociación de Padres y Madres (AMPA) del Colexu Públicu Rural Agrupáu Picos d’Europa, que-y treslladaron, el so esmolecimientu por esta asignatura “voluntaria que vien siendo escoyida por cuasi por el cien por cientu del alumnáu y que los estudiantes, mesmo que les families, siéntenlo como dalgo propio”.

“Sanjurjo recalcó que la protección de la diversidá llingüística tá recoyía na propia Constitución y comprometióse a lluchar pa ‘preservar toles variantes’ llingüístiques d’Asturies. Con too y con ello, a la hora d’explicar cómo contaba facelo, remarcó el so rechazu a cualquier acción concreta, incluyendo cualquier usu oficial del asturianu y dexó bien claro que, na so opinión, ‘lo verdaderamente importante’ pa preservar una llingua ye la utilización de la mesma ‘con naturalidad y de forma habitual’”, afirma García Poo.

“Les declaraciones del presidente del parlamentu asturianu son otra preba más del desentendimientu de los socialistes pa cola presencia del asturianu na escuela”, diz la diputada, que cree que “llama l’atención que la mesma alministración que se niega de continu a aplicar la vixente Llei d’usu del asturianu, que s’enseña inmovilista en cuantes a facilitar la so presencia pública y que, en definitiva, nun ye a enseñar un usu ‘natural y de forma habitual’ del nuestru patrimoniu llingüísticu, pida a los ciudadanos un compromisu qu’ella nun tién”.

La diputada manifestó que “la defensa del nuestru patrimonio llingüísticu nun ye cosa namás de los ciudadanos: les alministraciones tienen tamién la so responsabilidá”, y destaca que “nel usu cotidianu, na preservación y na promoción del asturianu la sociedá va mui per delantre de los políticos. Los principios constitucionales nun son declaraciones retoriques: tienen efectos prácticos”. “Con toles torgues que tien l’asignatura de llingua nel actual sistema educativu, les families de los escolinos siguen enseñando un compromisu pa col nuestru patrimoniu llingüísticu más p’alla del de l’Alministración”, añadió.