Uviéu.- Compromisu por Asturias reivindica la fecha de güei como un símbolu de resistencia que “salvando los distintos momentos históricos constitúi un exemplu de rebeldía ante la inxusticia y un actu d’afirmación  de la capacidá de Asturies en ser dueña del so futuru” y pide la so incorporación al calendariu festivu asturianu.

Dende Compromisu por Asturies recuérdase qu’el 25 de mayu ye una fecha que pasa casi desapercibida nel calendariu asturianu cuando esi día conmemórase, ensin nengún tipu de reconocencia institucional, ún de los fechos más importantes de la hestoria asturiana, yá que tres un motín popular la Xunta Xeneral proclamó la soberanía de Asturies, asumió como propia la bandera diseñada por Xovellanos qu’entá utilizamos, amás de crear el denomináu Exércitu Defensivu Asturianu y unviar embaxadores a Inglaterra.

Dende Compromisu por Asturies entiéndese qu’esti fechu tien dos vertientes que merecen rescamplar; per una parte l’afirmación efectiva de la capacidá de decisión soberana de Asturies, esto ye, d’un exemplu d’autodetermín, y por otra de resistencia popular ante la inxusticia, lo que supon un exemplu importante y un precedente que tien de ser recordáu nel contestu económico y social nel que s’atopa Asturies,  y que comparten bona parte de los pueblos de la nuesa redolada; los ataques a los derechos sociales y a les  conquistes históriques, ante lo que non cabe más qu’una respuesta en clave de resistencia.

Por ello dende Compromisu por Asturies reclámase qu’el 25 de mayu s’incorpore al calendariu festivu asturianu como un día nel que se conmemora l’enfotu de llibertá y resistencia de los asturianos y asturianes y que se recupere Sala Capitular, sede de la Xunta Xeneral nel momentu, como un  llugar simbólicu d’afirmación de la identidá del país.