Denuncia amás el burdo intentu d'engañu a la población cuando s'anuncia qu'un retayu del 24% nun va afectar a los servicios nin al empléu.
Nlimea.-Compromisu pol Nalón considera una tomadura de pelo les recién declaraciones de los responsables del gobiernu de la Mancomunidá del Nalón y de dalgunos de los grupos que formen parte de la oposición política, nesti Ente.
En 2010, el Grupu socialista ya IX, aprobaron unos presupuestos, dempués de cinco año ensin presentalos tan siquier, nes que, el voceru entós del grupu socialista, caltenía que, “Trátase d'unes cuentes que reflexen la situación actual, pero que van dexar atender tolos servicios afaciendo'l gastu”, simultáneamente IX defendía qu'aquellos presupuestos “yeren un pasu alantre pa recuperar la normalidá y potenciar l'organismu”.
Agora, vuelve'l PSOE a presentar unos Presupuestos p'anguaño 2013, calteniendo agora que “les cuentes llogren el caltenimientu íntegru de los puestos de trabayu y de los servicios.”
Lo cierto ye que'l Presupuestu de 2010, 2.651.837 euros, yá yera restrictivu al respective de los del 2005 y, los qu'agora nos presenten, yá nun ye que sían restrictivos, sinón que son “miserablemente atuñaos”, con unos ingresos un 24% inferiores de los del 2010, de resultes de los retayos de les aportaciones municipales aprobaos en cada conceyu.
Con estes cuantíes, que se diga que van a prestase los mesmos servicios, cola mesma calidá, namá puede entendese como un vultable intentu d'engañar a la población. En cuanto al caltenimientu del empléu, habría que ver si refiérese a tol empléu xeneráu na Mancomunidá, o namá al personal fixo, esto ye, habría qu'analizar l'impactu d'esti brutal amenorgamientu presupuestariu sobre l'empléu temporal.
Lo cierto ye que la Mancomunidá del Nalón liderada pol PSOE y los sos alcaldes, sofitaos en gran midida por IX, va tiempu que se convirtió nun cadabre alministrativu, que languidece subsistiendo a dures penes, que los aytos que la conformen, yá decidieron va tiempu que de dir tresfiriendo servicios municipales a élla, nada de nada y que, poro, la Mancomunidá del Nalón ye un mal col que tienen que trepar, y que non yá nun va siguir asumiendo nuevos servicios, sinón qu'a la primer oportunidá que se-yos presente va liquidase
