La Conseyería de Educación, Cultura y Deporte abrió ‘l plazu de presentación de los premios lliterarios en llingua asturiana 2013

El programa d'actividaes que'l Gobiernu d'Asturies preparó pa esta Selmana inclúi la celebración de dellos actos de calter institucional, la organización de conciertos, recitales, actividaes escolares, o la publicación d'una importante obra preparada espresamente pa la ocasión: El ríu y la memoria, antoloxía poética de l'autora valdesana Nené Losada Rico (1921-2009), escoyida y comentada pola profesora de la Universidá d'Uviéu Taresa Lorences.

Esta publicación va regalase'l vienres 3 de mayu (Día del Llibru Asturianu) cola compra d'otru llibru escritu n'asturianu.

Nesta 34 Selmana de les Lletres Asturianes resulta destacable la participación de la comunidá educativa y, sobremanera, la collaboración del alumnáu y docentes del Colexu Públicu San Miguel (Trevías, Valdés), centru que va acoyer l'actu escolar de celebración d'esta Selmana.

Amás, el Teatru de la Llaboral va acoyer, el miércoles 8 de mayu, la gala d'entrega de premios del I Certame de Teatru Escolar en Llingua Asturiana/Gallego-asturianu, nel que participarán 38 centros educativos.

Dientro del programa d'actos inclúyense otros munchos eventos, ente los que pueden reseñase:

• L'actu poéticu-musical El nome de las cousas. La voz de Nené Losada. Cola participación de los escritores Antón García, Taresa Lorences y Esther García; y l'actuación del cantautor Rafa Lorenzo. Grau, 29 d’abril, a les 19.30 hores.
• L'espectáculu Biltar, que se va celebrar nel Centru Niemeyer (Avilés) el martes día 30 d'abril a les 20.30 hores. Cola participación d'Alfredo González, Pandereteres de Fitoria, Anabel Santiago, Mapi Quintana, Héctor Braga, Sofía Castañón, Pablo Antón Marín Estrada, Aurora García Rivas, Xosé Anxelu Gutiérrez Morán, Pablo Texón y Xera.
• La Feria del Llibru y Discu n’asturianu, entamada en collaboración col Ayunamientu d'Avilés y l'Asociación de Llibreríes del Principáu d'Asturies, que va acoyer ente los díes 2 y 5 de mayu presentaciones de llibros, actuaciones musicales, sesiones de cuentacuentos, alcuentros lliterarios… La Feria va tar instalada nel edificiu de l'Antigua Pescadería Municipal d'Avilés.
• La presentación de los llibros ganadores de los premios lliterarios 2012, nuna mesa redonda que va tener como escenariu'l Salón d'Actos del Campus d'Humanidaes, n'Uviéu. Xueves, 2 de mayu, a les 19.30 hores.
• El conciertu del grupu Taranus, ganador el pasáu mes de marzu de la sétima edición del Premiu al Meyor Cantar y que va ser el representante d'Asturies nel Festival Liet International 2013 de les llingües minoritaries europees, certame que cunta col sofitu del Conseyu d'Europa y que se va celebrar na isla de Córcega.

Coles mesmes, ye de resaltar que la Xunta Xeneral del Principáu d'Asturies va sumase tamién un añu más a la Selmana de les Lletres Asturianes con un actu institucional y cola organización de visites guiaes en llingua asturiana pa escolares el martes 30 d’abril dende les 11.00 hores.

Convocatoria de 5 premios lliterarios en 2013

D’otra manera, la Conseyería d’Educación, Cultura y Deporte vien de convocar esta mesma selmana (BOPA del 23 d’abril) los premios lliterarios en llingua asturiana pal añu 2013:

• 34º edición del Premiu Xosefa Xovellanos de novela, pa obres de tema, xéneru y estructura llibres que tengan una estensión mínima de setenta y cinco páxines a espaciu doble.
• 19º edición del Premiu Xuan M.ª Acebal de poesía, pa obres de tema, xéneru y estructura llibres que tengan una estensión mínima de quinientos versos.
• 19º edición del Premiu Máximo Fuertes Acevedo d’ensayu, pa obres de tema, xéneru y estructura llibres con una estensión mínima de cincuenta páxines escrites a espaciu doble.
• VI edición del Premiu María Josefa Canellada de lliteratura infantil/xuvenil, pa obres de xéneru llibre y con una estensión mínima de doscientos cincuenta versos pa la poesía y de trenta páxines a espaciu doble pa los demás xéneros.
• V edición del Premiu Alfonso Iglesias de cómic, pa obres d’estilu, tratamientu y tema llibres, pudiendo abarcar el desarrollu d’una historia única o un conxuntu d’histories, y con una estensión mínima de cincuenta páxines.

Cada premiu tien una dotación de 3.000 euros. El plazu de presentación d’orixinales ta abiertu hasta’l 13 de setiembre d’esti añu 2013.