La decisión del "Principado" de subastar asturcones reflexa toa una filosofía de la que s’estrái que pa esti gobiernu tolo asturiano tien valor de saldu.

El recién anunciu per parte del "Principado" de que va subastar los 20 asturcones colos que cunta nel Monte Cayón, constitúi toa una amuesa de cuala ye l’actitú del "Principado" énte too aquello que seya padrimoniu de Asturies y de los asturianos, másime cuandu, comu ye’l casu de los asturcones, formen parte de la nuesa identidá hestórica colleutiva.

Con esta actitú, énte un problema mínimu comu ye la finalización del periodu nel que’l Conceyu de Piloña cedió-yos unes 120 hectáries de monte públicu pa esta fin, nun se molesten lo más mínimo en considerar otres propuestes, comu la rializada por Andecha Astur que garantizaba la permanencia de la especie nel Monte Cayón al traviés de la recuperanza de los tarrenes contaminaos polos ocalitales, nin siquier busquen un espaciu alternativu, sinón que cenciellamente desentiéndense del problema y desembarácense d’estos emblemáticos caballos asturianos, precisamente nunos intres nos que la situación económica que se vive pue provocar, comu allertó l’asociación de criadores (Acpra), qu’acaben nel mataderu.

Dende Andecha Ástur queremos denunciar esti fechu non solo pola gravedá que representa pa la pervivencia d’esta especie autóctona asturiana en pelligru d’esaniciu, sinón tamién no que tien d’espresión de les polítiques del "Principado" escontra Asturies y tolo asturiano, que lu lleven a despreciar y a desatendese, cuandu non a persiguir, toles espresiones de la nuesa identidá, seya nel planu llingüísticu, cultural, medioambiental o al mesmu texíu sociu-económicu que da soporte al nuesu Pueblu.

Otru tantu podríamos dicir del conceyu de Piloña, que desalluga a los asturcones y gasta dende va dellos años munchos miles d’euros na defensa del padrimoniu cultural andaluz coles sos eshibiciones de caballos andaluces, concursos d’engalanáu de casetes andaluces, traxes de faralaes y mises rocieres na llamada "Feria d’Abril", que ye l’actu cultural más importante del Conceyu. Bastante ye que l’alcaldesa de Piloña tamién ye del PSOE.

Güei son los asturcones, tolos díis ye Asturies.