Con motivu de la celebración de la XXXIV Sumana de las L.letras Asturianas, el Conceyu de Cangas del Narcea organiza’l V Concursu de cuentos n’asturianu Otilio Álvarez Rodríguez. El concursu vei ser una de las actividades principales d’esta sumana, que se celebrará cumo vien siendo avezao a principios del mes de mayu, ya vei tar dirixíu a nenos ya nenas del conceyu que tean cursando quintu ya sestu de primaria.
Cada participante vei poder presentar una obra namás: orixinal, inédita ya escrita n’asturianu, siendo posible usar las variantes occidental ya estándar de la l.lingua. Amás de participar no concursu, las obras presentadas van formar parte d’una exposición ya ser usadas en campañas de normalización l.lingüística. Las tres obras que choquen más al xuráu van ser premiadas con un lote de l.libros ya material escolar ya los autores van ver los sous textos publicaos na páxina web del Conceyu Cangas.
El Serviciu de Normalización L.lingüística, asitiáu na Casa la Cultura, yá’l destinatariu de las obras que los escolinos tienen d’entregar antias del 22 d’abril. Esti mesmu departamentu alvierte tamién a tódolos profesores ya al alumnáu interesáu no concursu sobre la posibilidá de faese con materiales ya consultar cuestiones de tipu l.lingüísticu.
