Cangas.-El Serviciu de Normalización L.lingüística de Cangas del Narcea feixo una campaña l.lingüística nueva dirixida a los más pequenos del conceyu. La campaña titulada El l.libru pa lo más pequenín de la casa consiste no repartu d’un l.libru de nome homónimu ente los menores de tres años del conceyu.
La Conceyala de Cultura ya Educación del Conceyu de Cangas del Narcea, Marta Fernández, xunto cona responsable del Serviciu de Normalización L.lingüística, Mónica Rodríguez, fixenon l’actu de presentación de la campaña na Escuela d’Educación Infantil Los Gigantinos ya entreganon un exemplar del l.libru a cadagunu de los 55 escolares del centru.
El l.libru pa lo más pequenín de la casa yá un albúm de alcordanzas pensáu pa recoyer los tres primeiros años de vida de los nenos ya nenas. Nél hai espaciu pa incluir fotos, incorporar datos ya faer xuegos.
La Conceyala Marta Fernández enfatizóu la importancia de trabayar pola normalización social de la l.lingua asturiana “pa garantizar la súa pervivencia ya tresmisión cumo vehículu de comunicación viva ente la población canguesa”. Asina mesmo, destacóu la función que vei desenvolver nesti sentíu la campaña El l.libru pa lo más pequenín de la casa, que persigue l’obxectivu de que “l’asturianu tenga presencia en cuanto a fondu ya forma nos momentos claves pal desenvolvimientu d’una persona”.
Pal conteníu del l.libru, el Serviciu de Normalización L.lingüística cuntóu cona colaboración especial de diversas personas, ente el.los de personal del SESPA. “Pa recabar información relacionada conas cuestiones más técnicas, por exemplu, tablas de percentiles, sirviémonos del asesoramientu del personal del SESPA, pa lo demás valiémonos de la sabiduría de los nuesos mayores”, esplica Mónica Rodríguez, responsable del Serviciu de Normalización L.lingüística.
El l.libru pa lo más pequenín de la casa amás de repartise ente l’alumnáu de la Escuela Infantil Los Gigantinos, vei entregase a tódolos recién nacíos de Cangas del Narcea. Pa el.lo, depositánonse exemplares nel aria de maternidá del Hespital Carmen ya Severo Ochoa, ande tódolos bebés recibirán el sou albúm personal al nacer.
