Blimea.-Hasta’l 8 de marzu na Casona del Bravial ta apierta una muestra de dibuxu y pintura de David Amores Ayala que lleva por títulu “Lluces y solombres”.

Los motivos que se reflexen nes obres espuestes son variaos, dende imáxenes escures y en blanco y prieto a pintures que destaquen pol so coloríu. Les persones, los xestos,  les cares y  los paisaxes tienen especial protagonismu nuna esposición onde la claridá, la oscuridá y el color s’entemecen  en dibuxos y pintures qu’empleguen técniques estremaes como l’oleu, el carboncillo y el pastel. 

David Amores Ayala (1976) ye natural de Llaviana y esta ye la primer vez qu’espón la so obra, pa lo qu’escoyó la Casona del Bravial de Blimea, centru que nos últimos años ta acoyendo los trabayos de munchos nuevos artistes de la cuenca del Nalón.

 L’horariu de visites ye de llunes a vienres peles mañanes,  de 9 a 1.