Comprometiéronse a implicase na busca d’una solución pal enseñu del asturianu o la toponimia, ente otres cuestiones

Madril/.iniciativapolasturianu.-Los despachos de los diputaos asturianos nel Congresu de los Diputaos, en Madrid, sirvieron d’espaciu pa los conceyos celebraos con Inaciu Galán, presidente d'Iniciativa pol Asturianu esti martes pásau. Ente los temes trataos, la situación del asturianu cola nueva reforma educativa o l’usu de la toponimia oficial asturiana nes carreteres estatales, mostrando tolos diputaos bona disposición pa da participar de forma activa na busca de soluciones, yá fuera dende la oposición, casu de PSOE, Foru ya IX, o dende la so posición de partíu de gobiernu, nel casu del PP.

Iniciativa pol Asturianu agradez a tolos diputaos la so disposición pa recibilos, y destaca que tolos partíos que representen a Asturies nel Congresu tán dispuestos a trabayar por un futuru meyor pa la llingua asturiana.

El primer conceyu foi con Antonio Trevín, diputáu de la FSA-PSOE y ex presidente d’Asturies, que se mostró dispuestu a sofitar con entrugues al gobiernu y otres iniciatives la continuidá de la prensencia del asturianu nes aules, que camienta “ye imprescindible pal futuru del asturianu”, al mesmu tiempu que coincidió con Iniciativa pol Asturianu en que “la perda de falantes ye’l principal problema que tien anguaño la llingua asturiana”.

Darréu recibieron a Inaciu Galán, Carmen R. Maniega y Ángeles Fernández-Ahuja García, diputaes por Asturies del Partíu Popular, que dende la so posición de diputaes del partíu nel Gobiernu, comprometiéronse a falar tanto col Ministeriu d’Educación, pal tema del asturianu na LOMCE, como col de Fomentu, pa facer porque esti departamentu use la toponimia oficial d’Asturies nes carreteres y otres instalaciones. Maniega espresó que’l PP foi siempres favoratible al asturianu, con midíes como l’aprobación de la Llei d’Usu del Asturianu en 1998. Amás, dambes dos recibieron de forma mui positiva la posibilidá d’usar l’asturianu n’actos públicos, pa lo que la organización ufrió la so collaboración.

Gaspar Llamazarez, diputáu d’Izquierda Xunida d’Asturies comentó col representantes d’Iniciativa pol Asturianu la so entruga parllamentaria presentanda al respective de la presencia del asturianu nel sistema educativu cola conocida como “Llei Wert”, al mesmu tiempu que se plantegó la posibilidá de facer nueves entrugues y proposiciones alredor de distintos temes rellacionaos col usu del asturianu o la toponimia oficial.

L’últimu diputáu en recibir a Galán foi Enrique Álvarez-Sostres, de Foru Asturies, que recordó que’l programa del so partíu recueye la defensa del enseñu del asturianu y la so inclusión reglada na etapa de 0 a 3 años. Al mesmu tiempu que destacó lo que considera “enorme importancia de que se consiga la reconocencia de la especialidá de llingua asturiana pal profesoráu”, lo que camienta pue ser la base pa futures reivindicaciones. Amás, mostróse dispuestu a llevar enmiendes y proposiciones sobre l’asturianu a la cámara alta.

Con toos ellos falóse tamién de la posibilidá d’incluyir a la llingua asturiana nos Presupuestos Xenerales del Estáu próximos, mesmo con un partida pa l’Academia de la Llingua Asturiana, como les demás academies del estáu, qu’en partíes pa sofitar la producción cultural, inclusión del asturianu nos Premios Nacionales de Lliteratura, televisión pública, usu nes páxines web de ministerios y otres instituciones, etc.

La valoración xeneral de los conceyos per parte d’Iniciativa pol Asturianu ye “mui positiva”, anque esperen poder valorar los mesmos según los sos resultaos futuros. “Esti yera un primer alcuentru col envís d’abrir, lo qu’esperamos seyan, unes rellaciones continuaes y granibles pa la llingua asturiana y la so situación nel ámbitu estatal, onde agora pue dicise que nun esiste”, esplicó Galán dempués de los conceyos.