Dende esti mes de xineru la piscina municipal de Samartín, asitiada en Sotrondio, presenta nueva rotulación informativa en caúna de les sos dependencies, de mou qu’a partir d’agora, amás d’ufiertar la información en castellanu, failo tamién n’asturianu. Continúa asina un procesu que’l conceyu de Samartín yá entamó fai varios años y col que yá se llevó a cabu la rotulación billingüe d’otros edificios públicos como l’Ayuntamientu o los polideportivos de Blimea y L’Entregu.

“Vestuariu masculín”, “Vestuariu femenín”, “Homes”, “Muyeres” son dalgunos de los 30 nuevos rótulos  que presenta esti equipamientu deportivu y colos que la llingua consigue facese güecu y tener presencia nunu de los ámbitos que más puen contribuyir a la so normalización, ya que se-y da presencia dientro de la propia alministración de los conceyos, lo que supón tamién da-y prestixu. Asina, ponse tamién de manifiestu’l claru compromisu que’l conceyu de Samartín ta asumiendo pa cola llingua nos últimos años. Esti trabayu llevóse a cabu a traviés de la so Oficina de Normalización Llingüística, y contó pa ello con una subvención de la Conseyería d’Educación, Cultura y Deporte del Principáu d’Asturies.