- El xuráu concedió esti gallardón por unanimidá, dotáu con 4.000 euros
Xulio Arbesú Rodríguez resultó ganador de la decimoctava edición del Premiu d’ensayu en llingua asturiana Máximo Fuertes Acevedo, que concede la Conseyería d’Educación, Cultura y Deporte del Principáu.
El xuráu que concedió esti gallardón, baxo la presidencia de la directora xeneral de Política Llingüística, Ana María Fueyo, contó cola participación de los escritores Lluis Portal Hevia (ganador de la edición anterior), Roberto González-Quevedo y el Catedráticu d’Hestoria Medieval de la Universidá d’Uviéu Javier Fernández Conde. El premiu ta dotáu con 4.000 euros.
Ente les obres presentaes, el xuráu decidió por unanimidá conceder el Premiu al testu tituláu Los deseos del dineru, destancando l’usu áxil de la llingua, l’actualidá del tema y la forma d’harmonizar narración y xéneru ensayísticu. El testu ganador presentóse col alcuñu de Rockefellerín.
Xulio Arbesú ye un veteranu escritor en llingua asturiana, destacando la so obra narrativa y ensayística. Ente les sos obres publicaes tan Misión Pelayo, novela xuvenil gallardonada col Premiu de Llectures pa Rapazos de la Academia de la Llingua Asturiana; Un raposu en Tresmonte, novela ganadora del Premiu Llorenzo Novo Mier de l’ALLA; Potestas, novela histórica cola que ganó en 2002 el Premiu Xosefa Xovellanos de novela convocáu pola Conseyería de Cultura; la edición de cuentos titulada Cuentos pa neños; El pisu d’enriba, novela cola que volvió ganar el Premiu Xosefa Xovellanos en 2006; y El destín treshumanu, ensayu col que ganó esti mesmu premiu Máximo Fuertes Acevedo d’ensayu na so edición de 2009. Amás tien publicáu en castellán l’ensayu La informatización del transporte.
FOTO de Ediciones Trabe
