Publicaciones Ámbitu presenta, el xueves 13 d’avientu, na sé uviedina de la SGAE, el discu Aire, ún de los trabayos más innovadores de la música tradicional asturiana y que firmen Xuan Nel Expósito, Jacobo de Miguel, Mapi Quitana, Marta Arbas y Anabel Santiago.

El discu Aire axunta, nun mesmu proyectu, a tres de les voces más poderoses de la música asturiana, les d’Anabel Santiago, Marta Arbas y Mapi Quitana, a les qu’arropen l’acordión de Xuan Nel Expósito y el pianu de Jacobo de Miguel. Amás, esti elencu de lluxu cuenta cola collaboración, en dellos temes, de los grupos folk Felpeyu y La Pingarata.

Aire ye un discu de música tradicional pero nun ye un discu de música tradicional al usu. Aire ye un discu sorpendente y innovador que se concibió para resaltar el papel de l’acordión diatónica na música asturiana de raigón y que, al final, acaba llevándolu, con éxitu, hacia fronteres nueves. Aire ye un discu elegante, creativu y enllenu de recursos, onde música y voz nun se pisen, arrópense, y onde lleguen a xenerarse pieces musicales d’una guapura y atractivu indudables.

Nesti trabayu tán presentes ritmos fundamentales de la tradición astur, como el son d’arriba, la muñeira, la xota, la danza y, como nun podía ser d’otra manera, la tonada, pero toos ellos interpretaos como nunca enantes se fixera. Soníos de siempre, pero con otru aire.

En total, diez temes que consiguen componen un discu dedicáu a l’acordión diatónica, un instrumentu perimportante na música tradicional asturiana que casi nunca foi protagonista d’un trabayu discográficu.