El Conseyu d’Europa, al traviés del sou Comité d’Expertos, publicóu’l sou tercer informe sobre’l cumplimientu de la Carta Europea de L.linguas Minoritarias, nél mantién las recomendaciones feitas al Gobiernu del Principáu d’Asturias sobre la necesidá de meyorar “la protección legal de la l.lingua asturiana”. Amás, l’informe tamién valora’l fomentu de la l.lingua tanto n’educación cumo en medios de comunicación ya’l funcionamientu de las oficinas de normalización l.lingüística.

Nesti documentu analízase con detalle la situación de las l.linguas minoritarias de toda Europa. Dientro d’España, l’informe abre dúas vías d’estudiu, una dedicada a las l.linguas oficiales (catalán, aranés, valencianu, eusquera ya gal.legu) ya outra hacía outras l.linguas minoritarias non oficiales, cumo son l’asturianu, el gal.lego-asturianu ou l’aragonés.

En referencia a la situación del asturianu, l’informe anima al gobiernu “a meyorar el sou nivel de protección dende l’Estatutu d’Autonomía”, yá que sigún siñala “el nivel de protección del asturianu nun cambióu, inda nun yá cooficial”. D’esta manera, el Comité d’Expertos díu’l sou apoyu a las peticiones de “los representantes de los falantes”, que ven na falta d’oficialidá una torga pa “la protección ya promoción de la l.lingua”.

Con todo ya con eso, el Comité d’Expertos "constatóu meyoras no usu del asturianu na relación conas autoridades, los medios ya la enseñanza”. Nesti sentíu, destaca la creación ya funcionamientu de la Dirección Xeneral de Política L.lingüística ya tamién l’apoyu a la presencia del asturianu nos medios, anque critícase que la programación n’asturianu namás represente un 3% na televisión pública.

Tamién se siñala cumo parte positiva’l funcionamientu de los 18 servicios de normalización l.lingüística del asturianu, la restauración de la toponimia ya las subvenciones pa edición de l.libros n’asturianu, amás del usu de la l.lingua asturiana nas representaciones de las compañías de teatru.

No casu de la educación, l’informe subraya la importancia de la creación de las titulaciones universitarias de l.lingua asturiana ya fai mención especial a la organización de los cursos de branu de la Universidá Asturiana de Branu (UABRA), que se fan dende l’Academia de la Llingua Asturiana en colaboración cona Universidá d’Uvieo ya’l Conceyu de Cangas del Narcea. Con todo, alerta sobre “la disminución na matriculación” en secundaria ya aconseya al gobiernu que se suba la ufierta d’asturianu, amás de que se creen condiciones favoratibles pa que l’alumnáu pueda cursalu.

En relación al gal.lego-asturianu, l’informe considera que se reconocíu la particularidá d’esta “fala” ya que se dienon pasos pa la súa preservación gracias a l’apertura de dúas oficinas de coordinación ya normalización l.lingüística na zona del Navia-Eo ya al apoyu a publicaciones nesti idioma. Con todo, critica l’ausencia del gal.lego-asturianu nos medios de comunicación.

En linias xenerales, l’informe feitu pol Comité d’Expertos recalca de forma positiva “l’esfuerzu ya’l compromisu de las autoridades d’Asturias en cuanto a la promoción del asturianu”, resaltando los avances alcanzaos n’educación, na alministración pública ya nos medios. Tamién insta al gobiernu español “a tomar mididas concretas pa meyorar la consciencia ya la conocencia de las l.linguas minoritarias del país, especialmente no casu de las que nun cuntan cono estatus de cooficialidá”.
 

FOTO: Ediciones Trabe