Cangas.-Quéi Funsiquín, en Xedré, acoirá’l vienres 12 d’outubre, dende las 19:00, el conciertu del grupu Asturiana Mining Company, qu’estiañu resultóu ganador del Premiu al Meyor Cantar, polo que representará a Asturias nel Festival Liet Internacional, el certame européu del cantar en l.linguas minoritarias, qu’enguano vei celebrase nel teatru de La Llaboral (Xixón) el próximu 1 de diciembre.
El conciertu de Xedré yá’l terceiru de los seis que’l grupu vei faer dientro de la “Xira 2012: Premiu al meyor cantar”, programada pola Conseyería d’Educación, Cultura ya Deporte pa presentar el sou discu nuevu Sones pa Berto Velasco, nel que s’inclúi’l cantar ganador del Premiu al Meyor Cantar que competirá no Festival Liet, tituláu Si nun conoces Val.louta. Un cantar orixinal escritu a ritmu de son d’arriba ou bail.le chanu, propiu del suroccidente asturianu ya del norte de L.lión.
Amás de la interpretación del grupu Asturiana Mining Company, Xedré vei ser l’escenariu de l’actuación de Pedro Pereira ya d’un conciertu de tonada a cargu de l’asociación cultural Canción Asturiana Narcea, nél van participar Soledad Rodríguez, Fino Moal, San Pedro ya’l gaiteiru Alberto Varillas.
