El sellu editorial va difundir, ente’l 2 y el 23 d’ochobre, quince pieces creatives sobre les obres principales del so catálogu al traviés de les redes sociales

Asturies- Publicaciones Ámbitu va desenvolver, del 2 al 23 d’ochobre del 2012,  una campaña de promoción de les obres principales del so catálogu editorial, que va llamase Un mes de llibros. Esta acción propocional naz de la necesidá de xenerar, al marxe de la Selmana de les Lletres y de la campaña de Navidá y del Día del Llibru, un eventu na seronda que valga pa promocionar la lliteratura n’asturianu y fomente la compra de llibros, amás del conocimientu y apreciu de les creaciones na nuestra llingua.
 
La clave ye xenerar espacios nuevos d’atención del públicu llector, agrupaos dientro d’acciones conxuntes y non, namás, en promociones d’un títulu concretu o una novedá editorial.

Con un diseñu mui cuidáu y, al empar, cenciellu, Un mes de llibros va componese de quince pieces creatives de tamañu A5 y formatu dixital, una por cada llibru que se va promocionar, que se van unviar de manera masiva a los 5.000 siguidores d’Ámbitu nes redes sociales Facebook y Twitter .

Ente los títulos escoyíos, hai lliteratura p’adultos y llibros infantiles. Con esta campaña promocional, Publicaciones Ámbitu quier aprovechar les tecnoloxíes nueves y les canales de comunicación más actives pa promocionar la lliteratura n’asturianu, de la que se destaca la calidá y l’interés pa los llectores. Amás, va facelo con planteamientos estéticos y testos que van dar una imaxe positiva del idioma, pa lo que s’escoyó un diseñu simple, comprensible y directu.

El primer llibru de la campaña va ser La maleta al agua, de Berta Piñán, al que van siguir El país del silenciu, de Vanessa Gutiérrez y Beatriz R. Viado; Cosa de tiempu, de Cristina Muñiz; El Sil que baxaba de la nieve, de Roberto González-Quevedo; Al dios del llugar, de Xuan Bello; Camín de Dios, de Naciu Varillas; Xente tan cerca, d’Antón García; Intersticios, d’Henrique G. Facuriella; Singularidá, de Pablo Texón; Bruxes 2. Paquín va a escuela, de Francisco Pimiango; l’antoloxía Cuentos pal mes d’agostu; Hestoria Universal de Paniceiros, de Xuan Bello; Sangre na braña, de Roberto González-Quevedo; Bruxes 3. El sombreru de Tila, de Francisco Pimiango, y Volver, de Xurde Fernández.