Cangas.-El SNL de Cangas del Narcea vei participar ente'l 4 d'outubre ya'l 10 de noviembre nuna exposición conxunta de la Rede de Normalización L.lingüística nos Conceyos no centru comercial de Mieres, Caudalia, dientro d'una serie d'actuaciones de colaboración ente la Rede de Normalización L.lingüística nos Conceyos ya la Xerencia d'esti centru comercial.

La Rede de Normalización L.lingüística nos Conceyos fai nesta exposición un repasu pol trabayu desenvolvíu nos 10 años últimos de l.labor, dende l'apertura del primer serviciu de normalización l.lingüística, el de Llangréu, hasta l'apertura del últimu, el de la Mancomunidá d'Ozcos-Eo, pasando pola puesta en marcha del de L.lena, Xixón, Mieres, Samartín del Rei Aurelio, Avilés, Siero, Cangas, Comarca la Sidra, Mancomunidá del Cabu Peñes, Llaviana, Corvera ya Parque Históricu del Navia, que forman el total de sedes activas de los servicios asturianos enguano.

Durante estos díaz años los servicios de normalización l.lingüística apostanon por normalizar l'usu del asturl.lionés ya'l gal.lego-asturianu ente la ciudadanía, implicándose na defensa de drechos tan irrenunciables cumo'l del usu del asturianu ya'l gal.lego-asturianu cumo l.linguas vehiculares nos diferentes Conceyos d'Asturias; tamién na promoción ya dignificación de los nuesos idiomas n'ámbitos diferentes de la vida, dende salú hasta educación pasando por muitos outros espacios ya actividades al traviés de campañas cumo las que nesta exposición bien s'espeyan.

10 años normalizando yá, por todo esto, el compendiu de 10 años de trabayu con un obxectivu claru: situar a las l.linguas d'Asturias nel sitiu que-ys correspuende cona colaboración d'una sociedá, la nuesa, que tien de ser garante de la súa supervivencia, porque la riqueza l.lingüística yá la parte más importante del nuesu patrimoniu.