Andecha Astur pide la intervención de la Fiscalía de Mediu Ambiente pa determinar la responsabilidá de los rescatadores na muerte del osu de Porl. lei, énte la sospecha d’una actuación neglixente.

Énte’l cúmulu d’inregularidaes que paecen arrodiar el rescate del osu de Porl.lei, qu’acabaron cola muerte del mesmu a los cinco minutos de ser narcotizáu y teniendo en cuenta que l’informe de la Guardia Civil nun pue ser imparcial al respeutive, darréu qu’ esti cuerpu sedríe en principiu co-responsable de diches inregularidaes, Andecha
Astur solicitó formalmente la intervención d’oficiu de la Fiscalía de Mediu Ambiente.

Les inregularidaes nesta nefasta actuación fueron denunciaes públicamente polos vecinos y pol mesmu presidente de l’Asociación de Cazaores “El Narcea”, y destacaron que “el llazu nun mató al osu, foi’l procesu de rescate”. La tardanza na actuación dende les 9 de la mañana en que se dio l’avisu fasta les 3 de la tardi qu’apaecieron los responsables de la Conseyería d’Agricultura, y la desatención demientres tou esi tiempu del animal, al que nin siquier se -y facilitó un pocu d’agua, supon tou ello una actuación desdexosa y omisión del deber de socorru, lo que de por sigoí yá costituyiría razón abonda pola que la Fiscalía actuara d’oficiu, y motiva la solicitú de Andecha Astur de que lo faiga lo más aína.

Llamentablemente esti nun ye’l primer casu nel que se produció la muerte d’animales en pelligru d’esaniciu en circustancies estrañes, nes que tamién se dio una intervención aparentemente anómala, precisamente de quien tuvieren de ser los responsables de velar pola so seguranza, ensin que fasta la fecha se procediere a abrir la pertinente investigación de los fechos, talo comu solicita Andecha Astur nesti casu concretu.