L’homenaxe a la Declaración de Soberanía del Conseyu d’Asturies y Lleón revistió especial emotividá nuna xornada soleyera na qu’una ventena presones aconceyaron nel monolitu comemorativu que s’afaya nel Puertu Tarna.

Tres la colocación d’un ramu flores nel monolitu que s’afaya nel Puetu Tarna, intervino’l Secretariu Xeneral d’Andecha Astur, qu’emponderó’l comportamientu de los miembros del Conseyu Soberanu, que pesia nun ser independentistes asturianos, nun dubiaron en proclamar la independencia de la República Española cuandu comprendieron que perxudicaba fondamente los intereses del Pueblu Asturianu, entamando un auténticu procesu revolucionariu que namás la fuercia de les armes del exércitu franquista y los sos alliaos alemanes pudieron torgar,

Nesi sen, tevo dures pallabres pal españolismu que frente a los fechos y la evidencia sigue pretendiendo que tala declaración de Soberanía, foi motivada pol aisllamientu, y non polo que los sos propios protagonistes argumentaron: la imposibilidá de defender Asturies y al Pueblu Asturianu de siguir baxo’l xugu de la República española.

Asina mesmo, fexo un paralelismu ente la situación d’entós y la d’agora, perafitando que güei comu ayeri, l’Estáu español pon en seriu pelligru la sobrovivencia d’Asturies comu Pueblu, y acusó a los partíos con representación na Xunta Xeneral, non solo de non seguir l’exemplu del Conseyu Soberanu de defender la nuesa nación perriba de cualsiquier consideranza, sinon de collaborar y ser complices de les  polítiques d’esterminiu que ta aplicando l’Estáu español n’Asturies y que tán llevando a la sociedá asturiana a una situación de sufrimientu y precariedá inaceutables.

Comu ye davezu, l’actu finó cola interpretación de la Flor del Agua.