Esti próximu xueves a les 19:30 hores inaugúrase na Casa de los Alberti de Ciañu la esposición Miraes dende les sombres. Esta muestra de fotografíes qu’organiza l’Asociación pro inmigrantes Intervalo y que cuenta cola collaboración del Ayuntamientu de Llangréu y el grupu El Arco va poder visitase hasta’l próximu día 30 de xunu.

Miraes dende les sombres ye una actividá más de l’asociación Intervalo tratando de consiguir la plena integración del inmigrante. Convencíos de que’l fechu de conocer nueves realidaes y establecer venceyos ente les persones constitúin los antídotos más amañosos contra la discriminación por inorancia, ponse en marcha esta esposición fotográfica.

Una esposición sobre xente qu lleva n’Asturies dalgo más de tres quinquenios, persones que viven nes nuestres ciudaes, que pisen les mesmes aceres, qu’utilicen los mesmos parques y que se crucen a diario con nosotros y nosotres. Xente que cuida a los nuestros mayores y que faen los trabayos más ingratos, pasando desapercibíos la mayoría les veces. Les nuestres prieses, los nuestros problemes, el nuestru ritmu vida, el nuestru mundu… nun nos permiten aparar a observar esa realidá que nos arrodia.

Ellos miren pa nós con güeyos grandes y xeneralmente atristayaos, en silenciu, esperando una palabra amiga, un xestu amable o una sonrisa. Les cámares de César J. Fernández (Mavic) y Luis J. Vigil-Escalera (Lujó) faen que nos detengamos y pongamos rostru a esa riqueza humana qu’esiste nel nuestru entornu más cercanu. Consiguen, sin dulda, que naza en nosotros l’interés por descubrir los deseos llexítimos de los y les que lluchen por una vida meyor. Esa persona qu’apaez impresa nun papel empieza a ocupar l’espaciu que-y correspuende, evitando que la so mirada se pierda otra vuelta ente les sombres.