L'Entregu.- La Tertulia Malory de L'Entregu, va entregar esti vienres 24 d’agostu, a les cinco de la tarde, el premiu al meyor llibru n’asturianu del 2011, nun actu públicu que se va celebrar nel pub Tom Malory de L’Entregu, onde dende fai 14 años la tertulia vien axuntando selmanalmente. La obra ganadora d’esta primer edición del premiu ye’l poemariu La ñeve del cuquiellu, del escritor Xabiero Cayarga. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Roberto Corte, Chechu García y Henrique G. Facuriella, que fallaron el premiu nuna sesión especial de la tertulia celebrada en Peñamayor el 9 de xunu del 2012.

El gallardón consiste nun troféu. nuna ilustración d'Alfonso Zapico y una medaya d’oru conmemorativa, amás de mercar venti exemplares de La ñeve del Cuquiellu pa ofrecer como regalu protocolariu nos actos organizaos o onde participe la Tertulia Malory.

Xabiero Cayarga (Cangues d’Onís, 1967) diose a conocer nes lletres asturianes en 1994 con El boleru de Xabel, novela que ganó’l Premiu de Narraciones de l’Academia de la Llingua Asturiana. Ye autor de los llibros de cuentos Les gatileres del cielu, Güelgues sobre’l llagu y A flor de piel. Amás, la so narrativa aparez recoyida na Antoloxía del cuentu asturianu contemporaneu, d’Ánxel Álvarez Llano, y en Muestra de nuevos narradores, de Ramón Lluís Bande. Nel 2006 publicó Trastes de bufarda, novela cola qu’abrió un silenciu editorial de cinco años, rotu nel 2011 con El sol negru de Wewelsburg(Trabe), un títulu que tien como protagonista a Marcial, un asturianu emigráu que se xunta con un grupu de neonazis que tien como base’l castiellu que da nome al llibru.

Como poeta, Cayarga ye ún de los autores asturianos más destacaos, con premios como’l Xuan María Acebal o’l Teodoro Cuesta, que recibió pela segunda vez gracies precisamente a La ñeve del cuquiellu, el so llibru de poesía más recién. La residencia, dende hai años, del autor n'Alemaña dexa un posu apalpable nel llibru, un tonu seriu, llimpiu y claru non faltu d'ironía y hasta humor, como cuando fai referencia a les ilusiones de la mocedá sobre la construcción d'una identidá nacional p'Asturies.