Ecoloxistes n’Aicción denunció que la situación nos reactores 1 y 2 de la central Fukushima (Xapón) ye pergrave. La esplosión nel reactor 1 motivó l’escape de radiactividad ente que los operarios trabayen pa esfrecer el núcleu del númberu 2. Pa la organización ecoloxista tratase d’una situación pergrave que vien agravar los efectos del terremotu.

La central nuclear de Fukushima entiende seis reactores d’agua en ebullición en funcionamientu y dos más en construcción, tamién d’agua en ebullición. Los reactores 1 y el 2, aquexaos de serios problemes, empezaron a funcionar el 26 de marzu de 1971 y el 18 de xunetu de 1974, respectivamente, y tienen potencies eléctriques de 460 MW y 784 MW.

El reactor Fukushima I ye, por tanto, similar al de la central nuclear de Santa María de Garoña (Burgos). Nes centrales d’agua en ebullición a l’agua de refrigeración fierve nel núcleu del reactor y el vapor estrayer de la cúpula de contención por unes tuberíes que percuerren delles dependencies de la central hasta llegar a les turbinas, onde se xenera la eletricidá. La estabilidá del reactor depende fuertemente de que se controle la cantidá de vapor nel núcleu, lo que depende de la presión y la temperatura.

La situación nun puede ser más grave porque se ta lluchando pa esfrecer los reactores pero nun ta garantizáu que se consiga caltener la reacción nuclear so control. El trabayu de los operadores vese bien enzancáu porque’l nivel de radiactividad multiplicóse per mil na sala de control, polo que los trabayadores que tean realizando les operaciones pueden tar recibiendo dosis radiactives percima del nivel dexáu, lo que va aumentar el estrés y la posibilidá de cometer erros

La esplosión producida en Fukushima I amuesa los intentos fallíos d’enfriamientu del reactor. Nes centrales d’agua en ebullición el nivel de vapor del reactor ye clave pa la seguridá, porque la escesiva cantidá de vapor que se produza nel reactor fadría que menguara la posibilidá d’esfrecer el núcleu radiactivu, lo que va aumentar el riesgu y accidente. Nesti tipu de centrales, les tuberíes de vapor radiactivu salen de la contención y percuerren delles dependencies de la de la central, polo que la esplosión d’una tubería fai que la radiactividad escape darréu al mediu ambiente. El que s’evite un accidente con fusión del núcleu y el consiguiente descontrol de la reacción nuclear pasa por que consígase esfrecer los dos reactores de Fukushima I ya II. Si esto nun asocede nes próximes hores, les consecuencies podríen ser catastrófiques.

Foi necesariu sacupar 46.000 persones qu’habiten nun radiu de 20 km en redol a la central. Por cierto que los Planes d’Emerxencia Nuclear de les centrales españoles namá preven actuaciones en redol a los 10 km de radiu de les nucleares. Tou esto suma a los problemes xeneraos pol terremotu. Tres esti accidente lo más sensato pal Gobiernu xaponés ye abandonar los proyectos de nuevos reactores y proceder al cierre escalonau de los 55 reactores nucleares que funcionen en Xapón.