Andecha Astur refuga que’l Conceyu de Xixón financie esa rancia espresión españolista basada na tortura animal y llama a los asturianos a participar nes amueses de repudia a la mesma.

Xixón.-Andecha Astur acusa nuevamente al Conceyu de Xixón de tar financiando col dineru de tolos ciudadanos les corríes de toros na ciudá, namá por caltener una rancia espresión españolista, basada na tortura animal, inaceutabale en cualisquier país que quiera considerase civilizáu y que cunta col refugu social de la imensa mayoría de los xixoneses y asturianos.

Nesi sen, Andecha Astur fai un llamamientu a tolos asturianos a que faigan visible’l so refugu énte esta amuesa de tortura ya incultura y a que participen viviegamente nes convocatories de refuga a les mesmes; ello ye, na convocatoria fecha por N’Ast de boicó a los establecimientos que collaboren d’una forma o otra con dichu espectáculu, y nel manifestamientu convocáu por Anadel pal próximu díi 12.
Andecha Astur quier resaltar que’l sofitu y financiamientu municipal d’esti espectáculu de tortura animal tien el so orixe nos gobiernos de “esquierda”, ello ye, del PSOE-IX, y la so continuidá agora con Foru, tou ello en base a la so concepción españolista d’Asturies, que los lleva a caltener a Xixón como postrer baluarte de les corríes de toros nel nuesu país, por más que, comu dicimos, nun resulten en dengún momentu rentables y seyan contraries a la nuesa cultura, tradición y sensibilidá.

A lo último, Andecha Astur quier destacar la contradición que representa esti sofitu municipal a la tortura pública de toros na ciudá del pernomáu Xovellanos, cuya tradición reivindícase de contino dende los socesivos gobiernos municipales, cuandu esti procer xixonés manifestó milenta vegaes tantu lo inaceptable d’esti festexu selvaxe como la so incompatibilidá cola cultura asturiana