"Cobrar dietes por asistir al manifestamientu a favor de la minería ye d’una baxeza moral namás comprensible dientru’l réxime de corrupción permanente xeneráu pol PSOE n’ Asturies"

Andecha Astur considera qu’Enrique Fernández, alcalde de Samartín del Rei Aureliu del PSOE, superó llargamente los niveles de baxeza moral permisibles pa cualisquier representante públicu al asignase cerca de 200 euros, en conceutu de dieta completa y media dieta de mantención de gastos, por cuenta de la so asistencia al manifestamientu de sofitu a la minería cellebráu’l pasáu 11 de xunetu en Madrid, y pide que si entá-y queda un mínimu de dignidá presente de forma imediato la so dimisión.
P’Andecha Astur, qu’un alcalde asturianu, ainda más d’un conceyu fundamentalmente mineru, atrevase a rentabilizar económicamente’l so sofitu a la exemplar llucha de los mineros pol so futuru y pol de tolos asturianos namás ye comprensible dientru’l réxime de corrupción permanente xeneráu pol PSOE n’Asturies, onde l’usu de les istituciones pa beneficiu propiu y de la rede clientelar xenerada a la so alredior costitúi una norma cotidiana.
Llamentablemente, el comportamientu corruptu d’estos políticos non solo los afeuta presonalmente o comu partíu políticu, sinón que, nesti casu, afeuta a tol conceyu de Samartín, a Asturies entera o y especialmente a la exemplar llucha que tán protagonizando los mineros asturianos en defensa del so puestu de trabayu, del futuru pa los sos fíos, pa les cuenques mineres y p’Asturies.
La sociedá asturiano nun puede nin tien de dexar estos nefastos exemplos, Enrique Fernández tien de dimitir darréu.