Iniciativa pol Asturianu abre asina una llínia de trabayu nel que van firmase alcuerdos con empreses pa que fomenten l’usu l’asturianu

UVIÉU. La organización Iniciativa pol Asturianu ta acabante firmar un conveniu con Splitweet, un xestor de cuentes de Twitter pol que la plataforma ufre dende agora una versión n’asturianu de tol sistema, lo que permite usar Twitter dafechu n’asturianu, pudiendo xestionar amás delles cuentes al mesmu tiempu. El sistema permite usar Twitter dende la plataforma Splitweet con tolos mesmos servicios qu’esisten na web d’esta rede social.

L’asturianu súmase asina a los cuasi 30 idiomes nos que ta disponible Splitweet, anque ye unu de los únicos 7 que tien la torna del sistema al 100%, xunto a inglés, castellán, catalán, danés, hindi y suecu, mientres otres llingües con millones de falantes como’l chinu, el rusu, el portugués o l’italianu tán tovía en niveles de torna inferiores al del idioma d’Asturies. La torna corrió a cargu de la organización Iniciativa pol Asturianu y nun cuntó con nengún tipu d’ayuda pública, mientres que l’encontu tecnolóxicu úfrelu Splitweet.

Iniciativa pol Asturianu espera que Twitter tamién use l’asturianu en futures ediciones agora que ta entamando a poner en marcha les plataformes n’otres llingües, como catalán o gallegu. Dende la organización asturiana va trabayase nesti campu, pues considérase imprescindible pa la normalización del idioma.

La so versión n’asturianu puede consultase en: http://ast.splitweet.com/