Uviéu.-El Director Xeneral de Política Llingüística, Alfredo Álvarez Menéndez, acompañáu pol Director Xeneral d'Ordenación del Territoriu y Urbanismu, D. José Miguel García Arias, y del técnicu del Centru de Cartografía, Alexis López Quintana, presentó en rueda de prensa'l “Nomenclátor Xeográficu de la Toponimia Oficial del Principáu d'Asturies”, un proyectu de catalogación, car-tografiao y xerarquización de los nomes oficiales de les entidaes de población según consten nos Decretos d’oficialización aprobaos pol Conseyu de Gobiernu y publicaos nel BOPA.
El N.G.T.O.P.A. foi desenvueltu por un equipu integráu por técnicos de la Dirección Xeneral de Política Llingüística y del Centru de Cartografía dependiente de la Dirección Xeneral d'Ordenación del Territoriu y Urbanismu, siguiendo'l modelu de datos definíu pol Modelu Nomenclátor d'España na so versión 1.2 (MNEv1.2). Respuende al compromisu anunciáu pol Director Xeneral de Política Llingüística na comparecencia ente la Comisión parlamentaria de presupuestos d'impulsar les midíes de “costu cero”.
El N.G.T.O.P.A. proxectóse como un doble preséu: de primeres, trátase d'una aplicación destinada a los técnicos del Serviciu de Política Llingüística responsables de la encuestación toponímica de los conceyos que-yos dexará introducir tanto los datos sociollingüísticos como tamién los cartográficos de cada topónimu oficial. Por esa razón, cada nome acompañase de datos tales como:
- la forma oficial anterior (según la codificación del SADEI),
- les variantes toponímiques que se constaten,
- la llingua (asturianu, gallego-asturianu, castellán),
- el tipu d'entidá (parroquia, barriu, casería, etc),
- el conceyu al que pertenez,
- la fecha d’oficialización,
- observaciones (llingüístiques, sociollingüístiques, sobre'l tipu d’entidá, etc),
- la posición xeográfica espresada por aciu de dos coordenaes: llatitú ETRS89 llonxitú ETRS89, lo que dexa la so localización ya integración con cualesquier otra información xeorreferenciada (cartografía, ortofotografía, redes de carreteres…).
De segundes, ye un preséu de consulta diseñáu pa que tolos usuarios (alministraciones públiques, medios de comunicación, empreses, asociaciones...) apuerten de manera rápida y efectiva a la toponimia oficial del Principáu d'Asturies. El Nomenclátor va tar por ello a disposición de tolos interesaos na web del Principáu d'Asturies (http://www.asturias.es), onde podrá consultase o descargase en dellos formatos d'usu habitual: “Pdf”, Excel, Microsoft Acces. Tamién ye posible descargar el Nomenclátor como una capa de datos de Google Earth, de cuenta que va bastar con tener instalada esta aplicación pa que al faer zoom sobre les zones del Principáu d'Asturies se visualícen los nomes na so forma oficial. Nesta presentación publíquense namás los datos relativos al Conceyu de Xixón, pero pasu ente pasu dirán arriqueciéndose colos topónimos de tolos conceyos que tienen el correspondiente Decretu d’Oficialización.
Cola publicación del “Nomenclátor Xeográficu de la Toponimia Oficial del Principáu d'Asturies”, dase un pasu más na oficialización y recuperación d'esta parte tan importante del patrimoniu cultural de los asturianos como son los nomes tradicionales de les nueses parroquies, pueblos, villes y aldees. La dificultá pa conocer les formes oficiales yá nun puede sirvir como escusa que xustifique l'incumplimientu de los Decretos d’oficialización toponímica del Gobiernu del Principáu d'Asturies, nuna materia na que, obviamente, tien plenes competencies.
