Por Biblioasturias.-El colectivu Hesperya ta a puntu de publicar, en formatu e-book, una nueva colección de lliteratura en llingua asturiana. Los sos primeros títulos van ser Dende tan lloñe, d’Héctor Pérez Iglesias; La solombra del flacu, de Rubén d´Areñes y Destruimientu del xardín, de Sofía Castañón.
E-sguil naz como una colección de ebook’s n’asturianu. Les nueves tecnoloxíes y el nuevu panorama editorial rellacionáu con elles demanden un apueste solvente y calidable. Nel casu concretu de la lliteratura en llingua asturiana, con un enorme potencial y una categoría oldeada, el formatu dixital puede dexar un importante aumentu nel espardimientu y conocencia de la creación actual.
Hesperya nació como un colectivu d’estudiantes de Filoloxía na Universidá d’Uviéu en 2006. Les sos actividaes nesa primer etapa fueron la edición d’una revista lliteraria, la puesta en marcha d’un grupu de teatru y l’organización d’actos culturales que dinamizasen la vida del campus. A día de güei, el colectivu sigue cola publicación de la so revista nuna segunda etapa, edita delles colecciones de poesía y organiza l’Alcuentru Nacional de Poetes Mozos “La Ciudad en Llamas”.
Dende l’añu 2008, el colectivu vien desenvolviendo un proyectu editorial que nació de la mano de dos colecciones poétiques en papel: Hesperya de Poesía y El flonderu entusiasta. Agora dan un pasu más nel so papel como editorial cola inauguración d’esta nueva colección de llibros en formatu electrónicu, que de xuru va cuntar con numberosos llectores. El proyeutu col sofitu de la Obra Social de Caja Rural.
Los títulos qu’inauguren esta colección son obra de tres voces destacaes ente les más nueves de la poesía n’asturianu.
Héctor Pérez Iglesias
(Arlos, 1978). Llicenciaú n’Historia pola Universidá d’Uviéu. Tien publicaos los llibros Las tardes baldías (KRK, 2004; Premiu Asturias Joven de Poesía 2003, en castellano), Prisión de naúfragu (Trabe, 2006), L’amarga cazumbre (Trabe, 2008; Premiu Nené Losada Rico de Poesía 2006), Como crecieres tu (Trabe, 2008; Premiu Teodoro Cuesta de poesía 2007), Desinencies (Ambitu, 2009) y Lo peor del bon tiempu (Trabe, 2010; Premiu Fernán Coronas de Poesía 2009). Algamó los premios Elvira Castañón de Poesía 2009 pola obra Aquella xente nunca sabía aú llevaben les carreteres xunta les que vivíen (Trabe, 2011) y Llorienzu Novo Mier de creación lliteraria 2011 pola obra La mano vacía (inéditu).
Héctor Perez Iglesias en Uiquipedia
Sofía Castañón
(Xixón, 1983). Filóloga, trabaya como realizadora na productora Señor Paraguas. Publicó los poemarios Animales interiores (Trabe, 2007, premio Asturias Joven de Poesía 2006), Últimas cartas a Kansas (La Bella Varsovia, 2008, Premio de Poesía Joven Pablo García Baena 2007), Tiempu de render (Trabe, 2010, Premiu de poesía Nené Losada Rico 2009) y los cuadiernos La sombra de Peter Pan (Ediciones 4 de agosto, 2009) y Culpa de Pavlov (Comuniter, 2011). Foi becaria de creación del Ayuntamiento de Madrid na Residencia de Estudiantes. Collabora con diversos medios de comunicación asturianos y nacionales.
Rubén d´Areñes
(Siero, 1983). Publicó los llibros Los venticinco pasos (Universos, 2008, Premiu Nené Losada Rico 2007) y Les páxines blanques (Trabe, 2009, Premiu de Poesía Fernán Coronas- Padre Galo 2008). Collabora con revistes como Lliteratura, Reciella Mallory o EsTandoriu. Poemes suyos apaecieron en diverses antoloxíes y publicaciones como Nayagua, revista de la Fundación Centro de Poesía José Hierro
