Publicaciones Ámbitu acaba d’editar, dientro de la so colección de narrativa, el llibru de cuentos Cosa de tiempu, de la escritora Cristina Muñiz, y la novela Sangre na braña, onde Roberto González-Quevedo narra una historia policiaca ambientada nos montes de Llión.

Los protagonistes de los cuentos que Cristina Muñiz recueye en Cosa de tiempu son héroes anónimos que llevanten la bandera del inconformismu énte un destín —non deseáu— ordenáu por otros. Son muyeres y homes comunes qu’entamen una llucha, individual o colectiva, por salvase, por salvar la pareya, por sobrevivir a la crisis o por vencer a la inxusticia o la decepción.

Pela so parte, Roberto González-Quevedo firma una novela enmarcada nun xéneru, el de la novela policiaca, poco cultiváu dientro de les lletres asturianes. La historia arranca cuando una familia aparez asesinada na cabaña d’una braña metida nel corazón de los montes. Los crímenes espanten y secuden a tola zona del Altu Sil. Nun s’alcuentren testigos y el misteriu parez anubrir el casu. Na trama atópense implicaciones internacionales xunto a sospeches inquietantes nuna sociedá marcada pola crisis económica y pol desaniciu de la minería y de la ganadería. Dalgliesh-Muxivén, investigador encargáu de descubrir a los culpables, alcuentra ciarraes toles víes de solución, anque queda un cabu sueltu que pue llevalu hasta’l culpable. La pista, que se pierde na güelga de la nieve, va hasta Bélxica, pero regresa al paraísu verde de la braña.

Cristina Muñiz (Xixón, 1953), autora de llibros de rellatos como El buscador d´hestories o Onde pisen poques güelles, destaca pola mano que tien pa narrar con naturalidá situaciones corrientes onde los personaxes, nun momentu de quiebra vital, tán abocaos a una mirada crítica pa colos convencionalismos, a cambiar de rumbu pa enseñar la so disidencia, la so condición de diferentes frente al sistema —l’económicu, el social, el familiar—, y p’abrir camín a la utopía, como un protagonista más.

Roberto González-Quevedo (Palacios del Sil, Xixón, 1953), vuelve con Sangre na braña a la tierra máxica del Sil, esta vez buscando resolver unos asesinatos misteriosos. Depués d’El Sil que baxaba de la nieve y d’Onde viven los amigos, agora la hestoria entra nel xéneru de la novela de misteriu. Pela narración van pasando investigadores famosos de la lliteratura policíaca que quieren ayudar a Dalgliesh-Muxivén a descubrir al asesín.
Amás de bien de títulos de carácter antropolóxicu, filosóficu o filolóxicu, como l’ensayu La cultura asturiana. Introducción a l’antropoloxía d’Asturies, González-Quevedo tien publicaes delles de les princi­pales obres narratives y poétiques de la Primer Promoción del Surdimientu. Muncha d’esta obra ta reu­nida en Pol sendeiru la nueite (1981; reed. 2002) y Pan d’amore (2004). L’autor ye tamién miembru de númberu de l’Academia de la Llingua Asturiana, onde ocupa’l cargu de Secretariu, y director de la revista Cultures, editada por esta institución y dedicada a temes antropolóxicos y etnográficos