La Casa Real desmintió de forma lacónica al diputáu d'Izquierda Xunida, Gaspar Llamazares, que'l rei Juan Carlos fuera comprensivu colos golpistes del 23-F nes hores posteriores a la intentona de 1981. Esta circunstancia señalase nun cable unviáu al so gobiernu pol entós embaxador alemán n'España, Lothar Lahn, autor d'esti informe en axuntándose col rei nos díes siguientes a la ocupación del Congresu. El pasáu mes de xineru'l selmanariu alemán ‘Der Spiegel’ sacó'l testu a la lluz tres la desclasificación de documentos oficiales fecha poles autoridaes xermanes.

Agora, dos meses dempués de la publicación d'estos datos, la Casa Real decidió negalos. El xefe de la Casa del Rei, Rafael Spottorno, unvió una carta a Gaspar Llamazares na que, con fecha de 8 de marzu, indica textualmente que “nin La so Maxestá'l Rei nin esta Casa acostumen a valorar escritos o opiniones de terceros, que son responsabilidá esclusiva de los sos autores, y que nel casu concretu al que se refier la so Señoría non se compadecen cola realidá d'unos fechos que'l so desenvolvimientu y corolariu final son de pública conocencia”.

La misiva de Spottorno empecípiase estimando a Llamazares “la so carta del pasáu 23 de febreru na que tresllada determinaes entrugues que, na so condición de diputáu, dirixió al Gobiernu, al empar que solicita respuesta a les mesmes”.

El parllamentariu d'Izquierda Xunida per Asturies decidió unviar directamente a la Casa Real, precisamente'l día d'otru aniversariu del 23-F, les entrugues parlamentaries empobinaes al Gobiernu sobre'l papel del rei nel golpe d'Estáu, que semana antes rexistrara nel Congresu pa la so respuesta por escritu.

Llamazares tomó esta decisión dempués de qu'estes cuestiones fueren “vetaes dos veces” pola Mesa del Congresu colos votos del PP y CiU, quien tamién refugaron dempués el recursu de reconsideración presentáu contra'l primer refugu.

Gaspar Llamazares estima la carta unviada pola Casa Real y nun entra a valorar el conteníu de la so respuesta. De la mesma, “llamenta fondamente” que la so iniciativa parlamentaria coles entrugues rexistraes “téngase que resolver d'esta manera, con intercambios epistolares, dempués de que la Mesa del Congresu paez que decidiera'l negativu camín de convertir en tema tabú non yá al 23-F sinón a la mesma monarquía”.

L'órganu de gobiernu de la Cámara Baxa –que cunta con mayoría absoluta del PP, que namá dexó un puestu a CiU en cuenta de coincidir nel sentíu del votu en temes relevantes- xustificó la so decisión de refugar toles entrugues de Llamazares col argumentu de que trataben “sobre materia ayeno a la competencia del Gobiernu, na midida na que refierse a supuestes actuaciones de terceros ensin someter al control parlamentariu de la Cámara”.

Sobre esti puntu, el parllamentariu d'IX sigui preguntar si ye que la Mesa de la Cámara Baxa “considera que'l rei ye un terceru” y valora que la Casa Real ye “una institución del Estáu” y, como tal, nun puede tar exenta del control parlamentariu.

Ente les entrugues parlamentaries rexistraes por dos vegaes por Gaspar Llamazares y que depués unvió tamién a La Zarzuela incluyíase pidir al Gobiernu del PP que valorara'l conteníu de la nota oficial unviada pol embaxador alemán en 1981. Amás, reclamó conocer l'allugamientu de toles grabaciones de les conversaciones telefóniques que tuvieron llugar el 23-F y el siguiente día, y si l'Executivu tien cuenta de desclasificar tolos documentos rellacionaos cola intentona golpista.