Uviéu.-La Xunta d’Escritores Asturianos 2012 encomienza esti xueves 1 de marzu, na Biblioteca del Campu San Francisco d’Uviéu -Centru de Llectura Lorenzo Rdguez. Castellano-, cola presentación a les 16h. del llibru Lliteratura asturiana, identidá y nación, llibru d’actes que recueye les ponencies y disertaciones llevaes alantre durante l’anterior Xunta d’Escritores Asturianos 2010 celebrada nel palaciu de Villa Madalena.

Dempués va ser l’escritor ayerán Ánxel Álvarez Llano quién dará comienzu a les interesantes ponencies de les xornaes con “A la solombra del Surdimientu”. La comunicación tendrá llugar a partir de les 16,30 hores y tará abiertu a la posterior participación y diálogu col públicu.

Les xornaes lliteraries d’esti añu tán dedicaes a la Oficialidá y desarrollaránse tamién nos díes 2 y 5 de marzu.

La xornada del vienres 2 de marzu centraráse na situación oficial del asturianu fuera les llendes alministratives de la Comunidá Autónoma del Principáu d’Asturies. Asina presentaráse’l llibru El patrimonio lingüístico cántabro editáu pol Goviernu de Cantabria en collaboración con ADIC, l’Asociación pa la defensa y los intereses de Cantabria que pretende sirvir de pauta o llibru de trabayu nel sistema educativu pal enseñu de la llingua na comunidá vecina. Ismael García Carmona, presidente del OSCAC, Órganu de Siguimientu y Coordinación del Estremeñu y la su Coltura, presenta pa la XEA 2012 una interesante ponencia sobre “L’estremeñu y la su literatura”. Darréu d’ello, la XEA ufierta un Alderique abiertu sobre la situación oficial y real de la llingua asturiana fuera les llendes alministratives del territoriu de la provincia d’Uviéu que dende 1980 ye’l territoriu actual de la Comunidá Autónoma del Principáu d’Asturies.

El programa de les xornaes va ser el siguiente:

XUEVES 1 MARZU

- 16 h. Presentación del llibru “Lliteratura asturiana, identidá y nación”. Actes de la Xunta d’Escritores Asturianos 2010.

- 16,30 h. A la solombra del Surdimientu, por Ánxel Álvarez Llano.

- 17,30 h. Barruntos y condiciones pal xorrecer d’un ensayu en clave nacional, por Carlos X. Blanco Martín.

- 18 h. Presente y futuru de la enseñanza del asturianu, por Xosé Lluís Colodrón Ardura, Responsable de la Secretaría de Llingua Asturiana del sindicatu SUATEA.

- 19 h. Presentación del llibru “Les Asturies y el nacionalismu bascu” de Xaviel Vilareyo, cola intervención de Llucía Fernández Marqués.

- 19,30 h. El modelu llingüísticu n’asturianu, por Xaviel Vilareyo y Villamil.