El miércoles día 4 de xineru publicóse nel Boletín Oficial del Principáu d’Asturies (BOPA) la convocatoria del “Premiu al Meyor Cantar” en llingua asturiana o gallego-asturianu, un galardón qu’algama nel presente añu 2012 la so sesta edición. El Gobiernu del Principáu d’Asturies instituyó esti Premiu nel añu 2007 col oxetivu de consolidar, arriquecer y prestixar la creación musical asturiana. D’alcuerdu coles bases, pueden optar a esti galardón les canciones con lletra n’asturianu o gallego-asturianu que se comercializaron ente’l 1 de xineru y el 31 d’avientu de 2011, siempre que sean obres musicales de creación orixinal. Queden excluyíes les pieces tradicionales yá esistentes, les versiones o adaptaciones d’obres de creación publicaes orixinalmente n’otra llingua, y les canciones que nun s’editaren y grabaren per primer vez nel citáu añu 2011.

Hasta’l día 20 de xineru ta abiertu’l plazu pa que los interpretes o grupos interesaos soliciten la so participación, indicando’l cantar qu’escueyen pa concurrir al premiu. Un xuráu formáu por espertos en música y llingua asturiana escoyerá d’ente los presentaos a los cinco finalistes, qu’actuarán en directo na Gala d’Entrega del Premiu, que se celebrará nel Teatru de la Llaboral (Xixón).

El grupu o intérprete ganador na presente edición representará internacionalmente a Asturies nel Festival de la Canción en Llingues Minoritaries (Liet International), organizáu col apoyu del Conseyu d’Europa.

Tola información sobre esta y les pasaes ediciones del Premiu al Meyor Cantar tará disponible nel sitiu web www.premiumeyorcantar.es, qu’ofrecerá noticies, fotografíes y información sobre los grupos y cantares finalistes. Amás de ello, un reproductor permitirá escuchar los temes que competirán na Gala.