Ye persabío que’l tránsitu de vehículos n’El Berrón ye eleváu; por ello, la ordenación y señalización correuta del mesmu ye dalgo fundamental. Dende Bloque-UNA de Siero queremos llamar l’atención d’una serie de circustancies que se dan ente’l ”cruce nuevu” y el “cruce vieyu”, na Avenida de Llangréu. Dende que se suprimió la segunda carril más allá del cruce vieyu, direición Xixún, la carril derecha ente los dos cruces queda habilitada namás que pal xiru a la derecha, pal centru urbanu. Dase’l casu de que l’actual señalización vertical y tamién les marques viales na carretera lleven a la confusión de los conductores, polo que se xeneren situaciones de peligru, que yá en dalgún casu terminaron n’accidente. A esta mala señalización hai que sumar les dos incorporaciones que pinchen esta cai. Una la que vien de la N-634 y otra la que vien del’avenida de Santander, pegaes la una cola otra, que n’ocasiones provoquen que s’atranque la carretera.
Por eso, dende Bloque-UNA de Siero proponemos que se tomen midíes que meyoren el tráficu y la seguridá:
- Iguar la señalización p’acabar cola confusión actual.
- Peatonalizar el tramu ente l’avenida de Santander y l’avenida de Llangréu, permitiendo en tal casu, la salida namás a los taxis..
- Impedir l’aparcamientu na zona onde anguaño ta la farmacia, nel cruce vieyu.
- Pidir más procuru a la empresa que mantién la rede semafórica, yá que na última avería, los vecinos d’El Berrón padecieron durante casi tres meses un caos circulatoriu por cuenta de nun atopar la regulación semafórica afayadiza, anque al final, tampoco quedó exactamente igual que taba.
