BA-UNA consideren que d´esta manera podríen aprovechase al máximu les potencialidaes de la zona rural del conceyu.

Les zones rurales asturianes supieron tradicionalmente sacar rindimientu de les sos potencialidaes. Dende los poderes públicos había trabayase p’apoyar y animar iniciatives nesi sen.

Apocayá el Conceyu Ribeseya punxo en marcha un proyeutu de subvención a sestaferies organizaes por asociaciones y coleutivos vecinales. Proponemos que s’estudie la posibilidá de faer lo mesmo, o dalgo paecío, en Siero.

El dineru que’l Conceyu Siero destina a llimpieza de caminos, poda de sebes y eliminación de basureros pirata podía dase a asociaciones o coleutivos de la zona qu’entamaren sestaferies pa esi trabayu; les perres diben asina revertir nel propiu mediu rural; y amás el Conceyu diba aforrar l’IVA.

Les brigaes deberíen tar integraes por xente de la zona en situación de paru, colo que se-yos diba proporcionar un ingresu estra.

Cumpliríase tamién una función pedagóxica sobre la importancia de respetar el mediu natural, yá qu’implicar a los vecinos y les vecines nesta xera diba valer tamién pa que nos pueblos fuera más difícil que se reproduxeran basureros o s’emporcaren sitios.

Fai falta tamién que’l Conceyu redacte y ponga en práutica un protocolu d’actuación no referente a podes y llimpieza nel mediu rural. Hasta la fecha les máquines que rocen pasen ensin miramientos pa con elementos vexetales qu’habría que respetar. La poda dexa a la vista cantidá de basura, pero nun hai una brigada que pase llimpiándolo. Obres feches pol propiu Conceyu dexen escombriu, cintes y porquería que nun se recueye.