- De nivel básicu y pa persones adultes, les clases del primer grupu van entamar el 5 d'ochobre, y les del segundu, el 11, con 42 hores llectives presenciales y telemátiques hasta payares
- Entamáu pola Federación Asturiana de Conceyos y la Conseyería de Cultura del Gobiernu d'Asturies, en collaboración cola conceyalía de Normalización Llingüística del Conceyu d'Avilés
- El plazu p'apuntase sigue abiertu pal segundu grupu, nel portal web falamos.info
La matriculación pal cursu d'asturianu del proyeutu Falamos n'Avilés frañó toles previsiones. Yá son 83 persones apuntaes, lo qu'afayó que se pudieren facer dos grupos d'estudiantes. El primeru, col plazu p'apuntase yá peslláu, entamará les clases el 5 d'ochobre; el segundu, col plazu tovía abiertu, el 11 del mesmu mes. Con un programa docente que se va facer, na so parte presencial, nel salón d'actos del Palaciu de Valdecarzana.
Entamáu pola Federación Asturiana de Conceyos, con subvención de la Conseyería de Cultura del Gobiernu d'Asturies, y la collaboración de la conceyalía de Normalización Llingüística del Conceyu d'Avilés, la matrícula puede facese de forma telemática nel portal web del proyeutu, falamos.info.
Ye un cursu d'asturianu básicu. Nivel Aniciu, pa persones adultes, y pal que, a lo primero, sólo taba previstu un grupu. Sedrá nos meses d'ochobre y payares de forma presencial y telemática. Les clases van dales docentes graduaos n'Educación Primaria, espertos en Llingua Asturiana y con esperiencia en formación de persones adultes n'asturianu.
La programación didáutica tien 42 hores formatives, que se reparten en 8 xornaes de dos hores y media caúna, a les qu'hai de xunir la parte que se da en rede, nos meses d'ochobre y payares.
Los temarios incluyen aspeutos rellacionaos col vocabulariu y la gramática: ámbitu personal y corporal, emocional y familiar; casa, pueblu y ciudá; comerciu y alimentación; trabayu y tiempu llibre. Tamién tienen recursos llingüísticos respeuto a entornos naturales, multiculturalidá, viaxes, internet y medios de comunicación.
Conteníos
- Identificación personal y familia: alfabetu, sustantivu y axetivu, vocalismu final, vocabulariu rellacionáu, saludos, dispidíes y presentaciones, descripción de cualidaes físiques de les persones.
- Casa, pueblu y ciudá (espacios y servicios): artículu y preposiciones, apostrofación, vocabulariu rellacionáu, descripción de les coses, cases y sitios.
- Comerciu y alimentación: Demostrativos, numberales y indefiníos, vocabulariu rellacionáu, costumes y festexos, coses que presten.
- El cuerpu y les emociones: Pronomes personales, posesivos, acentuación, vocabulariu rellacionáu, diálogos, indicaciones y conseyos
- Trabayu y tiempu llibre: Formes verbales básiques, vocabulariu rellacionáu, narración/descripción de vezos y de les coses que pasen
- La natura/El clima: Alverbios, llocuciones, pronomes y alverbios interrogativos, vocabulariu rellacionáu, pidir y dicir cómo ta'l tiempu, descripción y actividaes na natura
- Internet y medios de comunicación: Estructures comparatives, vocabulariu rellacionáu, entrugar coses de mou formal y informal
Viaxes y multiculturalidá: Conectores, vocabulariu rellacionáu, descripción de sitios/costumes, conseyos pa planificar un viaxe
