> La organización aconceyó col eurodiputáu asturianu Jonás Fernández nel parllamentu européu

Xixón, 6 de xunetu de 2023

Énte l’ataque a los drechos llingüísticos más básicos que se tán produciendo nestes selmanes, ente los que destacan l’intentu de VOX de prohibir les actuaciones n’asturianu nel Conceyu de Xixón, Iniciativa pol Asturianu busca víes nueves de trabayu nes instituciones europees. Por ello, el vienres pasáu, el vocal de la organización, Inaciu Galán, visitó al eurodiputáu asturianu Jonás Fernández na sede del parllamentu européu en Bruseles.

El conceyu foi bien granible, pues xurdieron delles propuestes de trabayu pa facer nos meses vinientes, aprovechando’l tiempu de la presidencia española de la Xunión Europea. Una de les propuestes pasa por llevar la situación del asturianu y otres llingües non oficiales d’Europa al parllamentu, al traviés d’una xornada divulgativa, asina como la posibilidá d’algamar sofitu institucional con propuestes que defendan la diversidá llingüística.

Galán destacó la disposición del eurodiputáu asturianu pa collaborar en cualesquier propuesta que suponga puxar pol asturianu. Nes próximes selmanes avanzaránse detalles más concretos de les actividaes que se llevarán alantre nos meses vinientes.

“Les instituciones europees son tamién parte de la cadarma institucional d’Asturies, y como tales, han implicase na defensa y protección del asturianu. La Xunión Europea amosó siempres una importante sensibilidá pa cola diversidá llingüística y cultural, polo que tamos seguros de que ye un camín que podrá xenerar víes interesantes de trabayu pal idioma”, esplicó Galán tres el conceyu celebráu en Bruseles.