Esti 2023, la UABRA vuelve a la presencialidá n'El Campu (Casu). En plenu Parque Natural de Redes, espérente una o dos selmanes, según la modalidá, nes que se somorguiar nun ambiente asturfalante con xente diverso y actividaes de toa mena.
La Universidá Asturiana de Branu (UABRA) ye un espaciu d’enseñu llingüísticu y cultural intensivu, dirixíu pola profesora y académica Cristina Valdés. Nél, l’Academia —en collaboración cola Universidá d’Uviéu, el Principáu y los conceyos qu’acueyen la programación presencial— ufierta dellos cursos, xebraos en tres categoríes:
- Formación Llingüística Xeneral, de dos selmanes de duración: cursos elemental y avanzáu de llingua asturiana.
- Capacitación Docente n’Eonaviegu, de dos selmanes duración y periodización biañal: los años pares desendólcase’l primer nivel y los años impares el segundu y el terceru.
- Cursos d’Afondamientu Cultural y Llingüísticu, d’una selmana de duración, dedicaos a meteries perestremaes: mediu natural, patrimoniu, música, deporte, traducción…
Amás, estos Cursos tienen, pal personal docente de Primaria y Secundaria d’Asturies, la reconocencia oficial de la Conseyería d’Educación del Principáu d’Asturies, darréu de l’acreitación de l’Academia como «Entidá Organizadora d’Actividaes de Formación Permanente del Profesoráu».
