> La organización presentó dos ponencies sobre los servicios públicos disponibles y el consumu cultural n'asturianu en nuevos formatos
Xixón, 5 de xunu de 2023
Alma Hidalgo, directiva d’Iniciativa pol Asturianu, participó los díes 1 y 2 de xunu nel alcuentru de Non-Kin State de la Federación Union of European Nationalities que se celebró en Altafulla (Tarragona). L'eventu valió pa conocer la ufierta en llingües minoritaries o minorizaes nes alministraciones públiques y la presencia de les mesmes nes nueves tecnoloxíes.
Hidalgo fizo dos intervenciones pa dar a conocer, por un llau, los servicios públicos disponibles n'asturianu y la capacitación llingüística de los funcionarios y, una segunda, p’afondar na presencia del idioma nel consumu cultural nos nuevos formatos como YouTube, TikTok o les redes sociales.
L’activista recalcó que l’asturianu ye una llingua que ta viva y que tien que futuru per delantre pero que precisa d’algamar l’estatus de reconocimientu d’oficialidá nel Estatutu d’Autonomía pa garantizar el so futuru y la igualdá de drechos ente tolos y toles ciudadanes. Alma Hidalgo apuntó tamién que les redes sociales y los nuevos formatos son una ferramienta tamién pa espardir l’idioma y de llegar a nueves xeneraciones, cuntando con bonos conteníos na llingua propia y resaltó la importancia de la presencia de la llingua asturiana nos medios de comunicación públicos.
FUEN ye la principal rede defensora de los grupos llingüísticos autóctonos d'Europa, y arrexunta a más de 100 organizaciones de 36 estaos europeos. La organización nació en 1949 en Versalles pa dar un papel dignu a les distintes naciones y minoríes dempués de la Segunda Guerra Mundial y últimamente coordinó iniciatives como'l Minority Safepack, una iniciativa lexislativa a escala europea para ameyorar la protección de les llingües non oficiales de la Unión Europea. Anguaño, FUEN ye la voz de les minoríes étniques, llingüístiques y relixoses n'organizaciones internacionales como la Organización para la Seguridá y la Cooperación n'Europa (OSCE) o la Organización de les Naciones Xuníes, na que tien un estatus consultivu. Amás, la entidá tien un papel participativu na Unión Europea y nel Conseyu d'Europa.
L'equipu de trabayu Non-Kin State Working Group ye un grupu de trabayu estable qu’agrupa a aquelles minoríes culturales, llingüístiques, étniques y relixoses. Tien 29 organizaciones de 15 estaos distintos. Ta presidíu pol Vicepresidente de FUEN Bahne Bahnsen (antiguu líder de la Friisk Foriining, asociación de defensa de la cultura frisona en Frisia del Norte, Alemaña).
Iniciativa pol Asturianu agradez a FUEN y a la Plataforma per la Llengua esta convidada pa presentar la realidá del nuesu idioma y por ser conscientes de la diversidá llingüística.
