- 469 estudiantes de cuartu a sestu de Primaria de los centros educativos de la ciudá van participar nunos percorríos mui especiales pel Parque Ferrera de la mano de Petunia y Clavel, tol mes
- El 18 de mayu celébrase'l Día Mundial de los Museos, nel Muséu de la Historia Urbana dientro'l ciclu Caleyavilés 2023
- Toles actividaes son de baldre
Pasáu mañana, vienres 5 de mayu, va celebráse un añu más el Día de Les Lletres Asturianes. Y Avilés xúnese a les celebraciones toa esta selmana de la mano de la Estaya de la Llingua de la conceyalía de Cultura, con visites teatralizaes al Parque Ferrera nes que van participar 469 estudiantes de cuartu a sestu de Primaria de los centros educativos de la ciudá, amás d'un alcuentru lliterariu y cuentacuentos. Toles actividaes son de baldre.
Les vistes van facese en cinco xornaes en doble sesión, cuatro d'elles. L'alumnáu de les escueles que s'apuntaren va poder conocer, d'una forma lúdica y prestosa, de la mano de dos guíes de restallu, Petunia (l'actriz Ana Morán) y Clavel (l'actor Borja Roces), los árboles más emblemáticos de la cultura asturiana, texos, carbayos, fayes, bedules.... Verderes ayalgues de los que'l gran pulmón verde de la ciudá abelluga exemplares espectaculares.
Una actividá qu'entama mañana, xueves 4 de mayu. A les 10.30 hores participa'l colexu públicu d'El Quirinal, y a les 12.00 hores, otra vez El Quirinal y el colexu públicu Palalcio Valdés. Pasáu mañana, vienres 5, les participantes sedrán les escueles públiques Enrique alonso (10.30 hores) y Marcos del Torniello (12.00 hores).
Les siguientes sedrán el 10 de mayu, col Enrique Alonso (a les 10.00 y a les 12.00 hores). El 11 de mayu, col colexu Salesianos Santo Ángel (a les 12.00 hores). Y van terminar el 29 de mayu, col Santo Ángel (10.30 hores) y el colexu públicu Sabugo (12.00 hores).
Día de les Lletres Asturianes
Pasáu mañana, vienres 5 de mayu, Día de les Lletres Asturianes, la Estaya organizó un alcuentru lliterariu cola escritora Blanca Fernández Quintana, dientro'l ciclu Autores nel Camín, col alumnáu del IES La Madalena, a les 13:40 hores.
Blanca Fernández ganó l'añu pasáu'l Premiu María Josefa Canellada de lliteratura infantil y xuvenil n'asturianu que concede la Conseyería de Cultura del Gobiernu d'Asturies con "El cartafueyu d'Alquimia". Una novela ambientada en Salas y con un argumentu rellacionáu col Camín Primitivu a Santiago, del que va falar cola so audiencia moza.
Esi mesmu día, y como premiu por ganar el I Concursu de Ramos de Navidá pa les escueles d'Avilés en 2022, neños y neñes del colexu públicu Marcelo Gago podrán disfrutar de los "Cuentos, Conseyes y Marionetes", cola actriz Elisabet Martín.
Día de Los Museos
Tamién en mayu, pero'l xueves 18, festéxase en tol mundu'l Día de los Museos, y dende la Estaya faise con una visita guiada de baldre pel Muséu de la Historia Urbana d'Avilés, con Denis soria, Guía oficial del Principáu d'Asturies, como cicerone. Sedrá a les 19.00 hores, dientro'l ciclu Caleyavilés 2023.
Son 15 les places disponibles, y ye necesario apuntase. P'apuntase puede facese nel mesmu MHUA, lo mesmo de forma presencial o per teléfonu nel 985 565 512; y tamién na Estaya de la Llingua llamando al teléfonu 985 545 508, per Whatsapp nel númberu 634 821 613, o per corréu electrónicu a la direición estayallingua@aviles.es
