> La organización tresllada la norabona a la Conseyería d’Alministración Autonómica pol usu del asturianu y del eonaviego na campaña

Xixón, 16 de marzu de 2023.

La Conseyería d’Alministración Autonómica, Mediu Ambiente y Cambéu Climáticu ta acabante de dar anuncia al pliegu de llicitación de la campaña informativa institucional por mor de les elecciones a la Xunta Xeneral del Principáu d’Asturies. Dientro de les característiques técniques del contratu se requier la presencia del castellán, del asturianu y del eonaviego.

Pa Iniciativa pol Asturianu esta ye una bona noticia porque permite, en primer llugar, visibilizar l’idioma nuna campaña que tien un gran impactu social y permite al mesmu tiempu normalizar les llingües propies d’Asturies, ensin incrementar el costu de la campaña informativa. Yera una reivindicación sobre la que va años qu'Iniciativa pol Asturianu vien insistiendo.

Por esti motivu, la organización tresllada la norabona a la Conseyería d’Alministración Autonómica, Mediu Ambiente y Cambéu Climáticu pol apueste nel usu de les tres llingües que conviven n’Asturies, siendo la primera vegada na historia qu’una campaña d’estes característiques tan presentes los tres idiomes de manera conxunta y n’armonía.

Pa finar, el colectivu recalca qu’esti ye un exemplu de normalización y de llevar alantre una verdadera política llingüística, onde les llingües propies d’Asturies tienen que tar presentes en tol trabayu institucional y en tola acción de gobiernu de l’alministración autonómica d’Asturies. Asina habría ser tol llabor institucional, usando les llingües d'Asturies con plena normalidá.