> La organización reclama a la Conseyería de Cultura, Turismu y Política Llingüística la presencia del idioma n’igualdá de condiciones que’l castellán, l’inglés o el francés
Xixón, 24 de febreru de 2022.
Iniciativa pol Asturianu ta acabante de rexistrar una reclamación énte la Conseyería de Cultura, Turismu y Política Llingüística pola ausencia de la llingua asturiana nes opciones de consulta nel nuevu portal web del Catálogu de la Rede de Biblioteques d’Asturies, dependiente de la conseyería de Berta Piñán.
La asociación de reivindicación llingüística considera incomprensible que nuna iniciativa dependiente de la conseyería de Piñán nun tean presentes l’asturianu y l’eonaviego, pero sorprendentemente sí otres llingües como’l francés o l’inglés, amás del castellán.
Iniciativa pol Asturianu recuerda, una vegada más, que l’asturianu tien que tar presente en tola acción de gobiernu, pero nesti casu, esa situación s’agrava pola falta de compromisu llingüísticu de la propia Conseyería de Cultura y de Política Llingüística que choca, en materia llingüística, col Estatutu d’Autonomía y cola propia Llei 1/1998, de 23 de marzu, d’usu y promoción del bable/asturianu.
La organización esixe a la Conseyería de Cultura, Turismu y Política Llingüística la presencia del idioma n’igualdá de condiciones que’l castellán, l’inglés o el francés porque tener presente l’idioma nesta web ye una manera tamién de normalizar, visibilizar y faer presente a la llingua asturiana qu’amás nun supone un encarecimientu nel desarrollu de la ellaboración y diseñu del portal web.
