> La cartelería de los conciertos pa conmemorar los mil años del entamu de la construcción del Monasteriu de Courias incumplía’l Decretu de Toponimia del conceyu

Xixón, 16 d’avientu de 2022.

Iniciativa pol Asturianu rexistró una reclamación ayeri al Conceyu de Cangas del Narcea mostrando’l so malestar pol incumplimientu de la toponimia na cartelería de los conciertos pa conmemorar los mil años del entamu de la construcción del Monasteriu de Courias, incumpliendo’l Decretu de Toponimia del conceyu.

La organización de reivindicación llingüística espón nel so escritu que nes actividaes propuestes pa esta celebración baxo’l nome ‘Música en la Basílica’ entamaes dende l’área de cultura del Conceyu de Cangas del Narcea nun contaben cola presencia de la toponimia oficial ya tradicional del llugar: Courias.

La entidá solicita d’esta miente, la presencia del idioma na cartelería de les actividaes propuestes pa la conmemoración d’estos mil años del monasteriu. Y amás reclama la presencia del topónimu tradicional “Courias”, en cumplimientu cola toponimia oficial. La propia Llei 1/1998, de 23 de marzu d’Usu y Promoción del Bable/Asturianu, establez nel so artículu 15, relativu a la toponimia, que “los topónimos de la Comunidá Autónoma del Principáu d’Asturies tendrán la denominación oficial na so forma tradicional. Cuando un topónimu tenga usu xeneralizáu na so forma tradicional y en castellán, la denominación podrá ser billingüe”.

Amás, Iniciativa pol Asturianu, nel so escritu, interesóse pol usu que nesti tipu d’actos se ta faciendo del idioma y de la toponimia oficial. Del mesmu mou, l’asociación recuerda la importancia que tien pa la normalización del idioma, el so emplegu nel espardimientu de cartelos informativos, páxines web o redes sociales pa tou tipu d’actividaes que dende les instituciones públiques se tean organizando o promocionando.