- Estrenaráse un audiovisual nes redes sociales y nes web del Conceyu y en PlayPresta, el 6 de mayu con una mesa redonda'l día 11
- Les escuelines del Conceyu de 0 a 3 años tendrán cinco sesiones de bebecuentos musicales cola actriz Ana Morán y el músicu David Varela
Cinco sesiones de bebecuentos musicales cola actriz Ana Morán y el músicu David Varela nes Escueles Infantiles d'Avilés y la recuperación de la figura y obra de la escritora avilesina Matilde de Soignie - cola presentación d'un vidiu que se va xubir a les redes sociales complementada cola organización d'una mesa redonda-, marquen les actividaes centrales n'Avilés de la XLIII Selmana de Les Lletres Asturianes que se desarrolla del 2 al 6 de mayu.
Sedrá'l vienres 6 de mayu, celebración del Día de les Lletres Asturianes, cuando s'estrene'l documental audiovisual sobre Matilde de Soignie que va poder vese peles redes sociales del Conceyu d'Avilés, na web de la Estaya de la Llingua y na plataforma Playpresta.
Matilde de Soignie ye la segunda escritora en llingua asturiana que se conoz (la primera foi Enriqueta González Rubín) y qu'hacia 1890, en vida, llegó a mandar a imprenta n'Avilés un llibru suyu escritu n'asturianu entituláu "Ecos de mi Aldea". Esta escritora avilesina, amás de ser un testimoniu mui importante pa les lletres asturianes colos sos versos, dio muestres clares nos sos escritos a lo llargo de tola vida de la so conciencia feminista y del so pensamientu avanzáu, daqué poco corriente nes muyeres de la so época y de la burguesía avilesina.
Pa siguir afondando na so figura, el miércoles 11 de mayu va ponese'l documental nel Palaciu de Valdecarzana (19:30 hores) pa dempués siguir con una mesa redonda na que van participar Mercedes de Soignie, investigadora y bisnieta sobrina de Matilde; Jose Ramón Iglesias Cueva, secretariu y miembru de l'Academia de la Llingua y estudiosu de la vida y obra de la escritora avilesina, y Inaciu Galán, flamante académicu de Llingua Asturiana y direutor del documental.
Bebecuentos. 'Ente pitos y flautes', con Ana Morán y David Varela
- Miércoles 4 de mayu. EEI El Quirinal
De 10:30 a 11:00 hores. Pa neños y neñes de 1 añu.
De 11:15 a 11:45 hores. Pa neños y neñes de 2 a 3 años
- Xueves 5 de mayu. EEI La Madalena
De 10:30 a 11:00 hores. Pa neños y neñes de 1 a 3 años
- Vienres 6 de mayu. EEI La Toba
De 10:30 a 11:00 hores. Pa neños y neñes de 1 añu
De 11:15 a 11:45 hores. Pa neños y neñes de 2 a 3 años
