Les dos xornaes del alcuentru valieron p’averar a representantes d’universidaes de tol mundu l’interés pol idioma

El filólogu Moreno Cabrera foi nomáu Embaxador de la Llingua Asturiana dientro del congresu internacional

MADRID, 28/04/2022. Esti xueves remató’l I Congresu Internacional de la Llingua Asturiana con un ésitu de participación y tamién cola conclusión xeneral de los participantes de diferentes universidaes del mundo de la necesidá de trabayar na oficialidá de la llingua asturiana. L’alcuentru, coordináu pol profesor Avelino Corral de la Universidad Autónoma de Madrid, y por Inaciu Galán por Iniciativa pol Asturianu col sofitu de l’Academia de la Llingua Asturiana, valió pa facer un analís con diferentes ponencies, comunicaciones ya meses redondes de la situación actual del idioma.

Los conferenciantes fixeron usu del asturianu, castellán o l’inglés pa presentar les diferentes comunicaciones. Les ponencies corrieron a cargu de profesores ya investigadores de les universidaes de Tennessee, Zurich, Varsovia, Oxford, Oklahoma y Washington y tamién de les d’Uviéu, Vigo, Autónoma de Madrid o Alcalá d’Henares, asina como de la Universidá Nacional d’Educación a Distancia que s’interesaron pola situación del idioma y recalcaron la necesidá de cuntar cola declaración de la oficialidá del idioma. 

Iniciativa pol Asturianu agradez a Avelino Corral, coordinador del congresu y profesor na Universidá Autónoma de Madrid, el so trabayu; asina como a los y les asistentes la so presencia y participación.

Moreno Cabrera, nuevu Embaxador de la Llingua Asturiana

El profesor Juan Carlos Moreno Cabrera ye un llingüista, caderalgu xubiláu de Llingüística Xeneral na Universidá Autónoma de Madrid y Doctor en Filosofía y Lletres y ye autor de 17 obres. Moreno Cabrera destaca pola so defensa de la diversidá y pluralidá llingüística insistiendo nos sos trabayos na igualdá de les llingües.

Iniciativa pol Asturianu acuta esta distinción honorífica d’Embaxador/a de la Llingua Asturiana pa les persones que, nun siendo asturianes o de territorios del dominiu asturllionés, tienen una trayectoria destacada como activistes en defensa de la llingua asturiana en distintos ámbitos y mui especialmente con iniciatives que permitan al asturianu facese presente n’ámbitos internacionales, ganar reconocencia y espacios de visibilidá.

Inaciu Galán, vocal de rellaciones institucionales ya internacionales d’Iniciativa pol Asturianu, fixo entrega del título d’Embaxador de la Llingua Asturiana y aprovechó pa recordar que “con esti reconocimientu Iniciativa pol Asturianu quier agradecer al profesor Moreno Cabrera esi analís de la realidá del asturianu y el so compromisu cola diversidá llingüística”.