“Esiximos un exerciciu d’esfuerciu, altor de mires ya interés pa llograr el cumplimientu del artículu 3.2 de la Carta Magna n’Asturies”

“Nun hai cosa más constitucional, asturiana, española y de visión d’Estáu que defender el cumplimientu de la Constitución en materia llingüística”

XIXÓN, 06/12/2021. Nesti 6 d’avientu, Día de la Constitución Española, Iniciativa pol Asturianu reclama la oficialidá de la llingua asturiana como’l meyor homenaxe a la Carta Magna. La organización quiso poner de manifiestu que “nun hai cosa más constitucional, asturiana, española y de visión d’Estáu que defender el cumplimientu de la Constitución en materia llingüística. L’asturianu como una llingua más tien qu’axustase a la Constitución y, por ello, resolver l’anomalía constitucional de falta d’oficialidá pal idioma”.

“Reclamamos a los grupos parllamentarios un exerciciu d’esfuerciu, altor de mires ya interés pa llograr el cumplimientu del artículu 3.2 de la Carta Magna n’Asturies. Nun podemos perder más tiempu nin esperar más porque los plazos qu’hai nesta llexislatura tan mui axustaos. Ye’l momentu d’avanzar, sentase a negociar ensin llinies coloraes y llograr la normalidá constitucional pa les nueses llingües” apuntó la entidá.

La organización recuerda que “nun hai cosa más constitucional, asturiana, española y de visión d’Estáu que defender el cumplimientu de la Constitución en materia llingüística, que ye sinónimu de defender la igualdá ente ciudadanos. Por ello, el meyor homenaxe que podemos facer n’Asturies a la Constitución ye l’aprobación de la oficialidá del asturianu dientro de la reforma estatutaria”.