A propósitu del cuestionariu de presupuestos participativos remitíu pol Ayuntamientu, el Bloque por Asturies-UNA de Siero manifestamos que:

Ye bono que’l gobiernu de la Casa Conceyu de Siero mos informe de los ingresos y los gastos; tamién ye bono que mos pida qu’espresemos les nuestres opiniones y que, amás, mos diga que les va tener en cuenta. Tolo que signifique acercar la Casa Conceyu a les vecines y los vecinos ye positivo. Pero esto que mos propón el gobiernu de Siero poco a nada tien que ver colos presupuestos participativos.

Los presupuestos participativos son una ferramienta de participación y de xestión, na que la ciudadanía ye parte activo na toma de decisiones referentes a l’asignación de los recursos públicos, llogrando asina que la ellaboración del presupuestu sía más democrática, y que’l procesu de toma de decisiones acerca d’obres y servicios responsabilidá del Ayuntamientu sía más tresparente. Ye la xunión real de la democracia directa y participativa cola democracia representativa. Tien que ser un preséu que valga pa:

• Descentralizar y distribuyir les inversiones públiques, poniendo a los pueblos y/o parroquies más necesitaes n’infraestructures y/o equipamientos de tou tipu nel primer puestu de les prioridaes del gobiernu del conceyu.
• Institucionalizar un mecanismu de participación vecinal na toma de decisiones referentes a la xestión de los recursos públicos.
• Crear cultura de participación que contribuya a llimpiar práctiques clientelares.

P’asegurar la participación plena, garantizar la democracia del procesu, y facer que les discusiones sían educatives y productives, el conceyu debiera dividise per parroquies. Nos núcleos urbanos, como La Pola Siero o Llugones deberíen buscase otres fórmules, por exemplu, per barrios o zones. Arriendes de los xeográficos, tamién se deberíen tener en cuenta criterios de tipu social. Ye fundamental contar cola participación de les asociaciaciones nes decisiones temátiques que-yos afecten.

El procesu a siguir poles vecines y los vecinos sedría:

- Pensar nes necesidaes de la parroquia, pueblu, llugar o barriu y presentar la propuesta nes dependencies de la Casa Conceyu, o mandala vía internet.

- Participar en conceyos abiertos, qu’han de crease a tal fin, onde participe personal téunico de l’alministración del Conceyu, que mos pueda orientar sobre la viabilidá o non de la propuesta.

- Acudir a les asamblees de vecinos, defender les propuestes y someteles a votación.

- Elección de representantes, que tendrán que velar pol cumplimientu de les propuestes a lo llargo del procesu.

Les propuestes más valoraes tendrán que les entregar los vecinos y les vecines al gobiernu del Conceyu pa la execución.

Al final d’esti procesu, los resultaos consiguíos nun tienen que se xulgar namás poles cifres, anque sían fundamentales pa demostrar que la participación, la tresparencia y la democracia puen facer que’l gastu públicu sía muncho más eficiente. Tan importante como los resultaos reales del presupuestu participativu ye la recuperación de la ciudadanía y el so espertar pa una participación activa nos asuntos públicos.

Con estes premises Bloque por Asturies – UNA en Siero solicitamos del gobiernu del Conceyu Siero qu’afonde nesta llinia de participación si ye que’l so propósitu ye daveres abrir calces a una democracia real y romper coles inercies polítiques que lleven años convirtiéndomos a les persones en meros votos numbéricos ocasionales pa xustificación de les sos falcatrúes.