- Organizaos ente la Estaya de la Llingua y los Centros Culturales, y que va dar l'Asociación Aladanza, ufiértense los talleres "Sones y Percusiones" y "Enteteyando"
- Con seis places en caún, pa neños y neñes de 6 a 10 años, son de baldre, y ye necesario apuntase enantes nos respeutivos centros.
Los Centros Culturales d'Avilés, en collaboración cola Estaya de la Llingua, organicen dos talleres infantiles n'asturianu, nos meses d'abril y mayu, col títulu de "Les tradiciones suenen y presten". De baldre, presenciales, pa neñes y neños d'ente 6 y 10 años, nos centros culturales de La Xungarosa / El barrio de La Luz, La Carriona y Los Canapés.
Dalos l'Asociación Aladanza, trátase de los talleres "Sones y Percusiones", nel mes d'abril, y "Enteteyando", en mayu y xunu. Dos propuestes bien prestoses pa que neños y neñes deprendan costumes asturianes d'enantes rellacioanes cola música, la percusión, l'alfarería y la industria artesanal de la teya, xugando.
Empiecen mañana, vienres 16 d'abril, na Biblioteca de La Xungarosa/El barrio de La Luz, de 18.30 a 20.00 hores, con "Sones y percusiones". La segunda sesión sedrá'l 23 d'abril en La Carriona y la tercera, el 30 d'abril en Los Canapés.
Con seis places pa caún, ye necesario apuntase nos mesmos centros culturales nos que se van facer. Hai d'usar mázcara obligatoriamente, amás de cumplir con toles normes de seguridá qu'indique'l personal.
Nel taller "Sones y percusiones" van deprender a facer un panderu tradicional a partir de dalgo tan fácil como una caxa pizza. Una forma d'averase a los instrumentos y a la música tradicional reciclando materiales usaos.
Nel casu de "Enteteyando", neños y neñes van conocer, xugando, les construcciones populares d'Asturies y la so rellación colos oficios d'enantes. Convertiránse en teyeros y teyeres, asoleyando la so creatividá modelando la so propia teya y decorándola colos símbolos tradicionales que más-yos presten.
Esti taller, tamién nel mesmu horariu de 18.30 a 20.00 hores, cumplirá esti programa:
- 14 de mayu, vienres. La Carriona
- 28 de mayu, vienres. La Xungarosa / El barrio de La Luz
4 de xunu, vienres. Los Canapés (Versalles)
