Nel so llabor d'espardimientu, normalización y afitamientu de la llingua asturiana, la Estaya de la Llingua d'Avilés programa un ciclu nuevu, col que festexar, con varies actividaes que se van poder siguir de forma telemática, cuatro de los nomaos díes especiales del añu: El Día Internacional de la Muyer, el Día Internacional de la Madre Tierra, el Día de les Lletres Asturianes y el Día Mundial del Mediu Ambiente.
Va entamar esti llunes, 8 de marzu, col Día Internacional de la muyer, dedicáu a una de les pioneres del feminismu n'América Llatina, la ecuatoriana Manuela Sáenz (1797-1856), que participó y encabezó los movimientos emanicpadores llatinomericanos, desobedeciendo los esquemes sociales de la época, impuestos pola moral tradicional y el patriarcáu milenariu.
El 22 d'abril, el Día Internacional de la Madre Tierra. Cola actividá preparada, podrá conocese un poco meyor un espaciu emblemáticu de la redolada d'Avilés, como son les dunes de L'Espartal, l'espaciu dunar más llargu d'Asturies. Declaráu Monumentu Natural, ta pente la ría y Salinas, nun espaciu d'unos tres quilómetros de llargo. Magar de que ye una zona mui castigada pol usu intensivu d'actividaes industriales, portuaries y residenciales, caltién una bayura especies de plantes.
El 7 de mayu, la Estaya va festexar el Día de Les Lletres Asturianes. La xornada na qu'Asturies fai un homenxe a la llingua asturiana, dende l'añu 1980, dientro la Selmana de les Lletres Asturianes. Autores d'Avilés y los conceyos que tán cerca pondrán voz a testos d'escritores d'Avilés y d'otres dómines dende un sitiu emblemáticu de la ciudá, l'escenariu del Teatru Palacio Valdés.
Pa terminar, el 5 de xunu ye'l Día Mundial del Mediu Ambiente, celebráu la primer vez en 1974, pa facer pensar a la xente en tolo que sufre la natura por culpa nuestro, con exemplos tremendos como'l furacu de la capa ozonu, la mala xestión de los productos químicos velenosos o'l problema l'agua nel planeta. Los árboles más emblemáticos del Parque Ferrera sedrán el puntu de partida de l'actividá.
Les propuestes son pa tou tipu públicu y van poder siguise nes redes sociales del Conceyu d'Avilés, la web de la Estaya de la Llingua llinguaviles.com, la revista dixital de la Fundación Municipal de Cultura avilescultura.com y la plataforma dixital Playpresta. Van tar disponibles dende les 00.00 hores de cada día.
Programa
- 8 de marzu, Día Internacional de la muyer
- 22 d'abril, Día Internacional de la Madre Tierra
- 7 de mayu, Día de les Lletres Asturianes
. 5 de xunu, Día Mundial del Mediu Ambiente
