La Xunta pola Defensa de la Llingua Asturiana (XDLA) denuncia que la web nueva del Institutu Asturianu d'Alministración Pública Adolfo Posada nun tien versión en llingua asturiana, lo que dexa en papel moyao les palabres del Executivu sobre la “tresversalidá” de la política llingüística.
La páxina https://iaap.asturias.es/, recibió 2,5 millones de visites y tuvo 192.293 usuarios en 2020, polo que la presencia del asturianu sería una muestra de compromisu col nuestru patrimoniu llingüísticu y del interés por da-y visibilidá, sobre manera ente'l funcionariáu.
Pa la XDLA que la web del Adolfo Posada dexe de llau l'asturianu ye otru exemplu más de la situación de precariedá que vive'l nuestru idioma y de lo necesario d'una política de normalización llingüística ambiciosa con recursos humanos y medios económicos, qu'otra vuelta ye evidente que siguen faltando.
Por eso, la XDLA reclama al Gobiernu autonómicu una versión n'asturianu de la web. Amás, según la organización, esto ye una muestra más de les consecuencies de la falta d'oficialidá y de la necesidá de qu'entaíne'l procesu de reforma del Estatutu d'Autonomía.