L'Anuariu de la Música Asturiana llega un añu más fiel a la so cita per estes feches y failo con un repasu fondu a lo que dio de sí'l recién pasáu 2020. Como de costume les temátiques céntrense n'estilos como la música tradicional, el folk, el rock o la canción d'autor, con secciones qu'inclúin reportaxes, informes, entrevistes, crítiques, opinión, recoyida de material o anuncies. L'Editorial, nesta ocasión titúlase «Autoxestión & Institucionalización» y nél fálase de la necesidá de combinar esos dos conceptos si queremos que la música d'espresión asturiana tenga futuru, nesti sen remárcase que: «Resulta cafiante y cansino tener que repetir añu tres añu les mesmes idees, esixencies y acciones a los poderes públicos d'esti país, que nun acaben d'entender y valorar lo que ye y representa la música asturiana. Y ye que nun falamos namás d'ociu o de hobby, facémoslo tamién d'economía, d'imaxe de país, de Marca Asturies... Pocos sectores culturales involucren a tanta xente y tan variao como'l de la nuestra música, por ello nun s'entiende l'abandonu institucional que caracterizó tou esti tiempu de réxime autonómicu».

En cuantes a los conteníos, destaca'l reportaxe tituláu «Crónica d'una pandemia» (onde se fala de les repercusiones qu'ésta tuvo na música asturiana), l'informe «Consumu dixital» (sobre cómo la música del país va adaptándose adulces a les plataformes dixitales); dos artículos sobre'l centenariu del Cancionero Musical de la Lírica Popular Asturiana d'Eduardo Martínez Torner («Los mayestros Torner y Benedito y la Xirandiya d'Avilés» y «Un futuru musical asturianu onde lo culto beba de lo popular»), les páxines especiales dedicaes a facer alcordanza de Celestina Ca Sanchu; o entrevistes al deejay xixonés Fruela 757, Muyeres y Lisardo Lombardía, amás de reportaxes fotográficos, artículos d'opinión, crítiques y cróniques. L'Anuariu zárrase, como siempre, cola sección Collecha, onde apaecen les producciones discográfiques del 2020. El volume compleméntase con un discu onde se recueyen muestres de lo meyor qu'ufiertó l'añu, con diecinueve cortes repartíos n'estilos como'l folk, el rock, el pop o la canción d'autor, con artistes y grupos como José Manuel Tejedor, Felpeyu, Muyeres, L-R, Alicia Álvarez, Toli Morilla, Tania Pereira, Nacho Vegas, La Tarrancha, Desakato, Misiva o K-Nalón.

Dende Goxe Producciones, editora d'esti anuariu, queremos rescamplar l'esfuerciu que supón una publicación como ésta (más nun añu como'l pasáu), gratuita y financiada esclusivamente con publicidá, con más de venti años de vida y una incidencia importante nel panorama musical asturianu. 

• Pa lleer l'Anuariu online: http://bit.ly/Anuariu2020
• Pa sentir el discu en YouTube: http://bit.ly/AnuariuCD2020